Shillong, Nailur 03 : U Myntri Rangbah ka Jylla Conrad K Sangma, ha ka sngi Ba-ar, ula kyntiew bad pynher ia ka lama lai rong ka Ri ha u narpost ba jrong 40 meter ha Barik Point bad pynbna ia ka jingthmu ban pynkylla ia ka jaka jong ka Tnad PWD ha Barik, sha ka Unity Park.
U Myntri Rangbah u la ong, “Mynta ka sngi ka dei ka sngi sah khana, haba ngi pynher ïa ka lama lai rong ka ri kaba jrong bad pynpaw ïa ka plan ba kongsan na ka bynta ban pynkylla dur ia ka jaka ha Barik”.
“Kane ka projek ka thmu ban pynitynnad bad pynlong ia ka nongbah Shillong kum ka nongbah kaba jyrngam, ha kaba la antad ban pynlut kumba T.25 klur tyngka. La khmih lynti ba kane ka jingtrei kan sdang ha u bnai Lber ne Nohprah mynta u snem” ula bynrap.
U Myntri Rangbah u la ban jur ba ïa kane ka projek yn pynwandur da kaba buh ha ka jingmut ïa ka jingsngew jong ki paidbah bad ka imlang sahlang, da kaba pynthikna ban ktah tang khyndiat eh bad ban pynneh pynsah ïa ka nam bad ka histori jong ki 9 tylli ki jingtei kiba la rim.
Kane ka Unity Park kan pyni ia ka jingiatylli jong ka jylla bad ka ri, kaban pyni ruh ia ki riti ki dustur bad ki jaitbynriew bapher bapher, kynthup ia ki Khasi, ki Pnar, ki Garo, ki Bodo bad kiwei kiwei ki jaidbynriew ha ka Jylla, u la ong.
U Conrad ula ong, ka park kan pyni ruh ïa ki jingshna dur kiba pyni ïa ki kolshor bad ki jaitbynriew bapher bapher, kynthup ïa ki kolshor jong kiwei pat ki Jylla bad ka Ri. “Kane ka park kan long kum ka jingpynkynmaw ïa ka jingïatylli hapdeng ki paidbah ka jylla bad ka ri” ula bynrap.
U la iaroh ia ka jingiatreilang hapdeng ka tnad Urban Affairs bad ka tnad PWD kaba don bynta ha kane ka projek kaba paw.
U Myntri Rangbah u la pynbna ruh ïa ki jingthmu ban wanrah ia bun ki project ban pynkylla dur ïa ka nongbah Shillong baroh kawei, da kaba khmih lynti ban lah pyndep hapoh ki 12 bnai ban wan. U la iai ban ïa ka jingdonkam jong ka jingïatylli, haba kdew ïa ka histori jong ki riewlum ka jylla kiba ïawan lang ban iakhun Jylla la ka jong bad kyrmen ba ka Unity Park kan long kum ka jingpynkynmaw ïa ka jingdonkam ka jingïatylli mynta bad ha ki por ban wan.
Haba kren ha katei ka jingialang, u Chief Secretary ka Jylla Bah D. P Wahlang, u la kdew ba kane ka jingkyntiew lama ka ri kan dei lehse kawei na kiba jrong bad heh duh hapoh ka thain Shatei Lam Mihngi ka Ri. U la pynpaw ba ka jingthmu ban pynkylla dur ïa ka Barik complex ka la don ha ka jingthmu bala slem bha hynrei khatduh ka la seisoh hapoh ka jingiohi jngai jong ka Sorkar kaba mynta.
Kane ka projek, kaba la antad ban pynlut haduh 25 klur tyngka, ka kynthup ia ki katto katne ki bynta ba kongsan. Kine ki kynthup ia ka jaka iaid kjat u paidbah, ka madan, ka jaka ieng taksi bad ka jaka ieng kali lem bad ka lynti iaid, ka jaka ieng kali shimet, ka jaka bam, ka jaka ialehkai jong ki khynnah, ka jingpynbha bad pyndonkam biang ia ki 9 ki jingtei bala rim (kiba la palat 100 snem) kum ki Tourist Information Centre, ki dukan die souvenir, cafes, galleries bad ki workshop.
Kine la iadonlang ha kane ka sngi ki kynthup ia ki Myntri Sorkar Bah Comingone Ymbon, Abu Taher Mondal bad ki Heh Ophisar ka Jylla.
