Shillong, Nailur 02 : Ka St. Anthony’s College, hynne ka sngi Nyngkong, kala pynkup burom ia ka samla pule Political Science ka Angelia N. Marwein, kaba la shah jied ban mihkhnat ia ka Meghalaya ha ka jingiakob Femina Miss India 2024.
Ha katei ka jingpynkup burom la wan ban iashimbynta da ki nonghikai bad ki samla pule bad kiwei kiwei kiba la shah khot sngewbha ban lehkmen ia ka jingjop bad jingnoh synniang jong ka Angelia.
U Principal ka St. Anthony’s College ula iaroh ia ka jingiaid lynti ka Angelia kum ka samla pule kaba trei shitom sha ka jingtbit ha kiba bun ki liang.
“Ka Angelia ym tang ba kala paw ha ka jingpule hynrei kala kiew shaphrang ruh ha ki kam kiba iadei bad ka imlang sahlang ha kaba iadei bad ki hok jong ki kynthei bad ban don ia ka jingryngkat kyrdan hapdeng ki shynrang bad ki kynthei. Ngi dap da ka jingsngewsarong ba kan mihkhmat ia ka Meghalaya ha ka rynsan iakob kaba pawnam ka Femina Miss India 2024 bad ngi don ia ka jingngeit kaba skhem ba kan pynlong ia ka jylla bad ia ka College ka jong ngi kaba sngewsarong”.
Ki kam jong ka Angelia ha kaba iadei bad ka Maitshaphrang Movement bad ka jingdonbynta ka jongka bad ka EARMACS, ban kyntiew ia ka roi ka par ha ki thain nongkyndong ha Khasi Hills bad Meghalaya, ki dei kiba la pynpaw kum kita ki jingnoh synniang ha ka jingkyntiew ia ka imlang sahlang.
Ka Angelia kala sdang ia ka jingiaid Model da kaba iatreilang bad ki kynhun kiba pawnam bad ban iashimbynta ha ki Fashion Event kiba kynthup ia ka Delhi Times bad Lulu Fashion Week. Dang shen kala ioh ia ka khusnam Femina Miss India Meghalaya 2024.
Haba ai jingkren, ka Angelia kala pynpaw ia ka jingsngewnguh ia ka St. Anthony’s College kaba la ai ia ka jingkyrshan kaba radbah ha ka jingiaid lynti ka jongka.
“Ka St. Anthony’s College kala long ka shlem ai jingnang jingstad ia nga bad ki jingtip bad ki jinghikai kiba nga la ioh kila iarap ha kaban tei ia nga kum ka briew kaba nga long mynta. Nga dap da ka jingsngew burom ban mihkhnat ia ka Meghalaya bad ban rah shakhmat ia kane ka jaka pule haba nga iakhun ia ka rynsan iakob thei bhabriew Femina Miss India 2024”.
Ka nongjop ia ka Femina Miss India 2024 kan ioh ban mihkhnat ia ka ri India ha ka rynsan iakob theibhabriew ha ka pyrthei ne ka Miss World kaba 73. Ka Miss India kaba mynta ka Nandini Gupta kaba na Rajasthan, kan pynphong ia ka pansngiat ia ka nongjop ha ka sngi kaba kut jong ka jingiakob.
