Shillong, Nailar 30: Ki nongialam jong ka Meghalaya Ex-Service League, kaba kynthup ia ki shipai kiba la shongthait na ka Indian Army, Navy bad AirForce ha ka sngi Balang kila leit jngoh iala ki jong ki dkhot kiba la noh ha ka rta.
Katei ka jingleit jngoh ka dei kum shi bynta na ka jingai jingshakri jong ka kynhun kaba ka ju leh man la ka por ban ai ka jingkyrshan ia ki dkhot kiba rim.
Ïa katei ka jingleit jngoh la ïalam da u General Secretary ka MESL, u Bah Buam Myrchiang ryngkat u Lt. Colonel (Retired) Bah Sebastian Marbaniang, Ex NK, Jedro Thabah bad u Ex, L/NK Grantis Basaiawmoit Ex, NK,Signals.
Kane ka kynhun kala leit jngoh ïa u Bah Sarshon Lyngdoh uba la ïashimbynta ha ka thma Indo-China ha ka snem 1962 bad ha ka thma Indo-Pakistan ha u snem 1965 bad ula iashimbynta ruh ha ka thma iakhun laitluid ka Bangladesh (Bangladesh Liberation War) ha u snem 1971. U Bah Sarshon Lyngdoh udei u shipai uba la shongthait na ka kam hynrei u don pat ha ka met kaba koit ba khiah watla ula kynjoh sha 94 snem ka rta.
Katei ka kynhun kala leit ruh ban jngoh ia u Ex, NK, ARC, u Bah Lot Singh Wahlang, uba la iashimbynta ha ka Indo-Bangladesh Liberation War 1971, uba la kynjoh mynta sha ka 80 snem ka rta.
Nalor kane, kila leit jngoh ruh ia u Ex, Rvts Indian Navy, u Bah Galvest Reenbohn uba la don 90 snem ka rta, hynrei hashwa kane, katei ka kynhun kala leit jngoh ïa u Ex, NK, Signals, u Bah Drowell Nongspung, uba la don 93 snem ka rta bad kila leit jngoh ruh ia ka Kong Pritina Wahlang, ka Kmie jongu Ex, Sepoy, (Late) Paul Walter Wahlang uba la shah pyniap ha ki lehnoh ka Kashmir ha u snem 2002.
Katei ka jingleit jngoh jong katei ka kynhun kiishipai ba la shongthait naka kam , kala sdang naduh u bnai Jylliew 2024.
Katkum ka jingiathuh jong u General Secretary ka MESL, u Bah Buam Myrchiang, ula ong ba ka jingthmu jong katei ka jingleit jngoh ka long ban ai mynsiem ia kitei ki shipai kiba la shongthait na ka kam kiba la len iala ka jingim ban shakri ia ka ri wat ha kaban duh ia ka jingim.
Ula pyntip ba ka kynhun kala iarap ia kitei ki shipai kiba la shongthait ha ka ban khmih bniah ia ki kot ki sla ki jongki, khnang ba kin ioh thikna ia ki jingiarap kum ka Pension bad ka Additional Pension hadien ba kila kynjoh sha ka 80 snem ka rta bad kiwei kiwei ki jingmyntoi hapoh jongka One Rank One Pension Yojana.
Ula ong ruh ba ka kynhun kala donbynta ruh ha kaban iarap ia kiwei pat ki para shipai hynrei khamtam eh ia ki bahaiing bahasem jong kito ki shipai kiba la shongthait na ka kam.
U Bah Marchiang ula ong, ruh ba ka kynhun ka donbynta ha kaban khmih bniah ia ki kot ki sla jong ki kurim bad ki khun jong ki shipai kiba la shongthait, khnang ba kin don ha ka jaka kaba ki lah ban ioh ia ki jingmyntoi khlem kano kano ka jingeh.
U Bah Buam Myrchiang ula pyntip ruh ba ki nongialam bad ki dkhot jongka Meghalaya Ex-Service League ki ju leh burom bad phah ia ka jingsngewlem sha ki bahaiing bahasem kiba la duh ia la ki baieid bathoin kiba dei ki shipai.
