Kyntait ka Iingdorbar ban ai bhah kyrpang ia ki ST ba duk ha ka Reservation Policy

Shillong, Nailar 27 : Ka Dorbar Synrai jong ka Iingdorbar Thaw Ain ka Jylla ha ka sngi Ba-ar, kala kyntait ban pdiang ia ka The Meghalaya Reservation for Non-Creamy Layer of Scheduled Tribes (in State Reservation Policy) Bill, 2024 bala wanrah da u MLA ka VPP na North Shillong Bah Adelbert Nongrum.

U Symbud Lamphang, Timothy D Shira ula buh ia ka Bill hapoh ka Iing ban ia vote bad kiba bun ki dkhot kiba kyntait da kaba ong “Em” kila bunpaid.

Kaba phylla ka long ba ym don uwei ruh u MLA jong ka Liang Pyrshah ki ban kyrshan ia kane ka Bill.

Haba wanrah ia ka statement of object and reason, jongka Bill, u Bah Adelbert ula ong ba kat kum ki jingkhein kiba don bad ka Sorkar Meghalaya, kila pyni shai ba ka ioh ka kot jong kiba bun ki paid Scheduled Tribe ka Jylla ka dei kaba tlot bad kaba rit.

Ka ong ba ka Article 16(4) bad 15(5) jong ka Riti Synshar ka Ri ka shah ia ka Jylla ban buh ia ki kyndon khnang ban pynthikna ba ki jingmyntoi jong ka jingai bhah ka dei ban poi sha ki nongshongshnong kiba duna ka ioh ka kot.

U Bah Adelbert ula ong ba naba ki 7 ngut ki Nongbishar ka Constitutional Bench ka Iingkashari Supreme Court ha ka 6:1 majority, kila pynksan ia ka jingtreikamka sub-classification hapoh ka kyrdan Scheduled Caste bad Scheduled Tribe bad ai ka rai ba ki Jylla ki don ia ka bor ban pynkha ia kine ki jingbuh kyrdan.