Shillong, Jylliew: Ka Sorkar Meghalaya Democratic Alliance (MDA) ha ka 9 tarik Jylliew kala mynjur ia ka jingtyrwa ban seng ia lai tylli ki College ha Jylla ba kynthup ia ka Veterinary College, ka Dairy College bad ka Fisheries College.
Ia kane ka rai la shim da ka jingialang jong ka kynhun Myntri bala pyniaid da u Myntri Rangba ka Jylla Conrad Kongkal Sangma uba pyntip ba ia ka Veterinary College bad Dairy College yn sa tei ha Kyrdemkulai, Ri-Bhoi District katba ia ka Fisheries College yn tei ha Ri-lum Garo.
Hynrei ula ong ba ia ka jaka ba thikna ban tei ia ka Fisheries College yn ym pat lah ban pynthikna bad ia kane yn sa rai hadien ba ka Tnad Fisheries kala phah ia ki jingai jingmut bad dep jied ia ki jaka kiban dei tang ha Ri-lumGaro.
Haba kylli ia ka jinglah ban pynrung klas ia ki samla pule, u Conrad ula ong “Ngi don ka jingkyrmen ba ka jing pynrung klas ia ki samla pule ha kine ki college kan long 60 la 100 manla u snem”.
Ha kajuh ka por, ka Kynhun Myntri kala ai jingmynjur ia ka Meghalaya District Court (Ministerial) Amendment Rules bad pyntip ba ia kane la leh halor ka jingphah ktien na ka Iingkashari Meghalaya High Court.
Da kane, ki District Court ki lah ban aikam ne pynlong ia ki interview ban thung kam lyngba ki District Selection Committee ha ka jaka ban hap pynlong da ka Iingkashari Meghalaya High Court.
