Shillong, Nailar 21 : U Symbud Myntri Rangbah ka Jylla bad Nongialam ka NPP Bah Sniawbhalang Dhar ha ka sngi Balang, ula pynrem jur ia ka jingkren ba dang shen jong u President ka VPP Bah Ardent M Basaiawmoit ba ong ba ka Meghalaya ruh ka donkam ia ka jingiakhih kaba iasyriem kumba jia ha Bangladesh.
“Nga pynrem jur ia kum kane ka jingkren. Ngi dei ki nongialam ba don jingkitkhlieh jong ka Jylla. Kum u Nongialam ka Jylla, ka dei ka kamram jong ngi ban pynthikna ia ka jingsuk bad jinshngain ba kan don ha Jylla. Ka suk ka sain ha Jylla ka dei kaba kongsan eh” ong u Bah Sniawbha.
“Ngam tharai ba ki paidbah ka Jylla kin kwah ia kum kine ki jingkren ba kin mih na ki nongialam sain pyrthei ka Jylla. Nga kyrpad ia baroh ki nongialam bad ki samla ba kim dei ban don ia kum kane ka jingmut jingpyrkhat. To ngi pyrshang ban tei ia ka Jylla. Lada ngi lah, ngi kwah ban ratdyngkhong ia u droks, ki kam bymman-ka dei ka kamram jong ngi” ula bynrap.
U Bah Sniawbha ula ong “Ban ong ba ngi kwah ia kajuh ka rukom iakhih kumba jia ha Bangladesh, ngam tip shuh u nong ialam ba kumno uba kwah ba ka Meghalaya kan mad ia kajuh ka jinglong jingman kum ka Bangladesh”.
