Shillong, Nailar 16: U MP ka seng Congress na Tura Parliamentary Constituency u Saleng A Sangma hynne ka sngi Thohdieng, ula kyntait ia ka jingkam ka BJP ba kala kyrshan ia u ha ka elekshon MP ba dang shu dep bad ula kob ruh ia ka seng NPP lada ka nud ban beh noh ia ki arngut ki MLA ka BJP na ka sorkar MDA.
Haba ïakren bad ki nongthoh khubor, u Saleng ula ong, “Haba u Bernard u kren halor kano kano ka kam, (hato phi ngeit) ba baroh kin shim ïa ka kum ka jingshisha kum ka gospel? Hato phi tharai, ba ka BJP kala pynlong ïa u Ricky kum u MP ne ïa nga ban long u MP? Ka BJP bad ka Congress ki long kum ka ding bad ka um. Ngin ym ia khleh lang satia da lei lei ruh, nga tharai kila sdang luiñ ka jingmut jingpyrkhat namar ba nga la kylla long kum u MP.”
Ula ong, ka dei ka BJP bad ka NPP kiba ïatreilang.
U MP ula ong, “Haba phi leit sha Delhi lada phi kylli ïano ïano ruh khamtam eh ia ki Myntri Sorkar, ki shim ïa kane ka jylla ba ka dei ka jylla kaba synshar da ka NDA. Kumta, ha kano ka dur ba ngi ïoh jingkyrshan na ka BJP? Hato phi lah ban iathuh ia nga?”
Ula ong, ba ula pan ia ka jingkyrshan shimet na ki nongialam hynrei ym na ka seng BJP ha ka por elekshon MP Lok Sabha.
“Nga la leit sha ki katto katne ngut ki nongialam. Nga la leit ruh sha ki nongialam na ka NPP ban kyrshan lem ia nga. Kam mut ba kila kyrshan ia nga halor ka nongrim ba kila ioh ia ka jingbthah na ka seng” ong u Saleng.
“Ka BJP kam shym la kyrshan ia nga bad kin ym kyrshan hi ruh ia nga ha ki por ban wan” bynrap u Saleng.
U MP ka Congress u la ong, “Lada ka NPP ka don ia ka jingshlur bad jingnud, hato kan kynjat noh ia ki 2 ngut ki MLA BJP? Beh noh ia ka BJP, beh noh ia kine ki arngut ki BJP (MLA) bad ngeit ia ka jingkren jong u Nongaiktien u jongki. Hato kin nud ban kynjat noh ia kine ki arngut ki BJP (MLA) na ka kynhun synshar, leh shwa ia katei bad ngin sa kren hadien bad ong ruh ia ki ba kin kren shaphang ka Congress.”
“Ki (NPP) kim donkam ia ki arngut (BJP) namar kila don lypa 43. Kim donkam ia ka jingkyrshan na ka BJP. Lada ki don ka jingshlur bad jingnud kidei ban beh noh, ong ia u Rakkam ba un beh noh ia ki, nangta sa ong pat ia ki, ba kin kren shaphang jong nga,” la kob u Saleng ia ka NPP.
