Shillong, Nailar 13 : U Myntri ka tnad Pule Puthi ka Jylla Rakkam A Sangma u la ong ba ka jingjanai jong ka pule puthi ha jylla Meghalaya ka kham lah bad kham biang ban ia kiwei kiwei ki jylla hapoh ka Ri.
U Myntri ula kynthoh ia kane halor ka jingbymlah jong ka North-Eastern Hill University (NEHU) ban ïoh jaka ha ka thup ki 100 tylli ki skulbah ba pawnam jong ka ri, katkum ka National Institutional Ranking Framework (NIRF) kaba la pyllait paidbah ha ka sngi Nyngkong.
Haba kren sha ki nongthoh khubor, u Rakkam u la ong, “Ngam tip kaei ka kyndon ba la buh bad halor kano ka nongrim la pynlong ïa ka jingïanujor halor kane. Lehse ka don beit ka jaka ban pynbha ia kano kano ka jaka pule. Lehse hadien ba la wan ka NEP, ka NEHU jong ngi ka lah ban donkam ia ka por ban kyntiew ialade, lehse donkam ban wanrah sa katto katne ki tnad.”
“(Hynrei), ngam tharai kumta da kane ka jingpynbeit kyrdan baroh, ngi lah ong ba ka pule puthi kala nang hiar. Kane kam long kaba shisha…nga kwah ban ong ba ka jinglong jingman jong ka jingpule jong ngi, ngi long kiba kham biang ban ia kiwei pat ki Univeristy ba long kumjuh bad ngi namar ngi don ki professor, ki nonghikai bad ki nonghikai kiba tbit,” u la ong.
“Don ki skulbah ki dei ban don katto katne ki surok kiba bha, ki iing kiba bha, ki bos kiba bha, kata ka la dei ban pyndap katto katne ki mat hynrei ka jinghikai klas ka dei ka tynrai ne ka tynrai kaba pynlong ia ka jingbha jong ka jingpule. Hooid, ka jaka pule jong ngi ka lah ban duna katto katne ki jingdonkam ba kongsan,” bynrap u myntri.
Haba kylli, u Rakkam u la ong ba ka State Education Commission ka la peit bniah ia baroh ki bynta ba kumno yn kyntiew ia ka pule puthi ha ki kyrdan kiba heh bad kiwei kiwei ki kyrdan pule puthi.
“Ki (commission) ki la aiti ïa ka kaiphod ba nyngkong ar-lai bnai mynshwa bad ngi dang bishar ïa kine ki kaiphod baroh” u la bynrap.
