Shillong, Nailar 13 : U Nongialam ka NPP bad Myntri Sorkar Rakkam A Sangma ha ka sngi Ba-ar, ula ong ba ka party (NPP) ka long kaba kloi ban pdiang sngewbha ia ki laingut ki MLA ka Congress lada ki wan ban pyniasoh.
“Ka NPP khlem pep kan pdiang beit iano iano ruh, la ki dei ki Nongialam seng sain pyrthei ne ki MLA. Ka dei ka sienjam kaba biang palat ban pdiang ia ki lada ka khubor ka dei kaba shisha ba ki laingut ki MLA ka Congress kin sa wan iasoh noh sha ka NPP” ong u Rakkam haba iakrren bad ki nongthoh khubor.
Hynrei ula pynpaw pat ba um pat don jingtip satia la ka dei kaba shisha ne em ba ki MLA ka Congress kin wan pyniasoh sha ka NPP.
“Hynrei ban shong ha ka Liang Pyrshah hi kan ym don jingmut satia. Ka dei kaba bha palat ban iatrreilang naba ha ba kut jong ka sngi, ngi dei kiba shakri ia ki paidbah-ngi hap ban shna ia ki surok, ki skul, ki hospital. Teng teng ha ka sain pyrthei, lada dei kaba iong, ngi hap ban pynman kaba lieh”.
Dang shen kila mih ki khubor ba kam ba lai ngut ki MLA ka Congress ba kynthup ia u Bah Gabriel Wahlang, Charles Marngar bad Bah Celestine Lyngdoh, kin sa leit pyniasoh noh sha ka NPP hashuwa ka elekshon shiteng samoi ha Gambegre constituency.
