Nongpoh Nailar 12 : Ka Executive Member (EM) ka Tnad Forest ka Khasi Hills Autonomous District Council (KHADC) Kong Magdalyne S Mawlong, hynne ka sngi Nyngkong, kala hiar sha Lailad ban iakynduh ia ki nongshongshnong ka Umladoh namar ka jingmih ka jingkynnoh ba pynjulor ka Laitlad Beat Office ia ki jingthung jingtep ki nongrep.
Ia ka EM la synran lang da ki Ophisar ka Tnad Forest ka KHADC ha ka jingiadon ryngkat u MDC ka thain Bah Balajied Rani, u Lyngdoh ka Raid Sohkhwai Bah Spasion Syllang bad kiwei kiwei.
Dang ha ka taiew bala lah, ka Lailad Beat Office jong ka KHADC, kala leit jynrat bad pom naphang ia ki jingthung jingtep jong ki katto katne ki longiing ka shnong Umladoh, kiba la thung hapoh ka jaka jong ka Council. Kine ki jingthung ki kynthup ia ki diengkwai, ki dieng kait, u sohtrun bad kiwei kiwei.
Ka EM kala iakynduh ia u Rangbah Shnong ka Umladoh Bah Wet Syngkli lem bad ki Longiing kiba kynnoh pynjulor ia ki jingthung jingtep jong ki ban pynshai ia ka kam bala leh da ka Tnad. Kala pyntip ba kane ka jaka ba ki thung ki tep ka dei jong ka Council haba pyntip ba ka Council naduh u snem 2004,2005 bad 2006 kala dep pynmih ia ka jingmana ia ki nongrep ba kim dei shuh ban pyndonkam ia ka jaka jong ka Council ha ka rep ka riang.
Haba iakren bad ki nongthoh khubor, ka kong Magdalyne kala pynpaw ba kaei kaba jia dang shen ka dei namar ka jingbym kohnguh jong ki nongshongshnong ka Umladoh ia ka jingmana jong ka Council. Kala kyntu ia ki paidbah ba kim dei shuh ban kyntur ia u pud u sam jong ka Council.
Ha kane ka sngi, kine ki Longiing kila dawa ia ka District Council ba kan siew ia ka bai lutksan ia ki jingthung jingtep kiba la shah pynjulor.
Halor kane, ka EM kala pynpaw ba ia kane ka mat, kan sa rah iakren bad u Chief executive Member (CEM) bad ka Council kan sa pyntip ia kaei ka rai halor kane ka jingdawa.
U Lyngdoh Raid Sohkhwai, u Bah Spasion Sylliang, u la pynshisha ba kane ka jaka ba rep da ki nong Umladoh ka dei kaba long trai da ka KHADC haba kyntu ia ki nongshongshnong ba kim dei shuh ban kyntur ia u pud nangne shakhmat.
Na ka liang u Rangbah Shnong ka Umsohma Bah Shembok Mawphniang, u la iathuh, ba dei lyngba ka jingtreishitom jong u Incharge ka Lailad Beat ba Lailad plantation jong ka District Council kala neh bad ka nang rben lyngba ki jingthung dieng bapher bapher bad dei ka jingtreishitom jong u Incharge ba la lah ban weng ia ki kam tuh dieng kiba man ka por ba ju jia ha kine ki plantation.
Ula ong ba dei lyngba kane ka plantation jong ka District Council bun tylli ki Shnong ki thaw ki ioh ia ka umbam umdih bad kiwei kiwei ki jingdonkam.
 ka Tnad Forest ka Khasi Hills Autonomous District Council (KHADC) Kong Magdalyne S Mawlong, hynne ka sngi Nyngkong, kala hiar sha Lailad ban iakynduh ia ki nongshongshnong ka Umladoh namar ka jingmih ka jingkynnoh ba pynjulor ka Laitlad Beat Office ia ki jingthung jingtep ki nongrep.){kind=link}