Shillong, Naitung 14 : U President barim ka US Donald Trump ula shah siat bad mynsaw na ka skhor katba u dang ai jingkren ha ka rally elekshon ha Pennsylvania, kaba paw kum ka kam ban pyniap ia u.
U Nongsiat, ula siat haduh saw kuli ia u Trump hynrei tang uwei ula shei ia ka skhor ka mon jong u Donald Trump bad ha kane ka jingjia, uwei u nongleit rally ula iap bad arngut kila mynsaw jur na ka jingshei ki kuli.
Ka video ka pyni ba u Donald Trump ula rah ia ka kti bad ktah ia ka skhor ka mon hashuwa ba un dem katba ka jingther kuli ka dang iaid. Ki US Secret Service kila tur wut wut sha u Trump bad kila tawiar ia u ha rynsan hadhuwa ba kin ialam ia noh ia u sha ka kali. Katba u Trump u dang iaid sha kali bad shuwa ban rung ha kali, ula rah ia ka kti sha ki paidbah.
Ka FBI kala ithuh ia u nongsiat uba la kyllon iap halor jong kawei ka jingtei kaba don marjan bad kane ka jaka ba pynlong ia ka rally. Une u nongsiat u kyrteng u Thomas Mathhew Crooks ba 20 snem, uba dei na Bethel Park, Pennsylvania.
Ha ka jingthoh ha ka Truth Social Network, u Trump ula ong ba u kuli ula sam lyngba ia ka bynta ba shalor jong ka skhor ka mon. U nongaiktien jong u, ula pynthikna ba ula ioh ia ka jingsumar ha kawei na ki jaka sumar hapoh ka thain.
Ka video kala pyni ruh ia ka jingkhah ka snam ha ka skhor bad ka durkhmat u Trump katba ki US Secret Service ki dang ialam noh ia u.
Ia une u Nongsiat la siat iap da ki US Secret Service Officer kiba pahara ha kane ka jaka, ong u Anthony Guglielme, uba dei u Nongaiktien ka Agency.
