Nongstoin, Naitung 12: Hadien ka Khasi Students Union-North Khasi Hills District, hynne ka sngi Thohdieng pat sa ka Khasi Students’ Union-West Khasi Hills District, kala pynieng ia ka khyrdop Inner Line Permit ne khyrdop ILP ha surok Athiabari, ban pyrrkhing ia ka jingrung jingmih ki bar Jylla shapoh u pud u sam ka West Khasi Hills District.
Kane ka jingpynieng khyrdop ha Athiabari kala jia tang hapoh shitaiew ba pynieng khyrdop ILP ka KSU- North Khasi Hills ha Pahammawlein, kaba la shah thang dusmon noh ha kine ki khyndiat sngi bala leit.
Ym tang katne, ka KSU ha kane ka shitaiew bala leit, kala pynlong ruh ia ka jingkhynra work permit ia ki nongbylla bar jylla ha kylleng ki jaka jong ka Nongbah Shillong bad ha kiwei kiwei ki District.
Ka KSU kala shim ia kane ka sienjam namar ka jingkynnoh pynslem jong ka Sorkar ban pyntreikam ia ka Inner Line Permit ha Jylla bad kumjuh ruh ia ka Meghalaya Resident Safety & Security Act.
Dang ha kine ki khyndiat sngi, u Myntri Rangbah ka Jylla Conrad K Sangma ula pynsngew ba ki kynhun Sengbhalang kim don bor satia ban talasi ne khynra nongbylla bar jylla haba kren shai ruh ba “Ym donkam Work Permit” ia ki nongbylla bar jylla kiba wan trei bylla hapoh ka Jylla.
