Shillong, Naitung 10 : Ka Sorkar Jylla ha ka sngi Balang kala pynbna ia ka rai ban khangdam noh ia ka Meghalaya State Housing Board (MSHB) bad kan pynlut haduh T.7.42 klur ha kaban ai ia ka Voluntary Retirement Scheme (VRS) sha ki 18 ngut ki Nongtrei jong ka Board.
Haba kren sha ki lad pathai khubor hadien ka jingialang Kynhun Myntri, u Myntri Rangbah ka Jylla Conrad K Sangma ula ong “Kumba phi iatip ba kane ka dei ka rai kaba la sahteng la slem bha bad bun ki nongtrei haka Housing Board kila tyrwa ban leh noh kham kloi ia kane….kumta, ia ka mat la wanrah mynta ka sngi bad ka Kynhun Myntri kala mynjur ia ka jingtyrwa ban khangdam noh ia ka MSHB bad ban ai VRS sha ki 18 ngut ki Nongtrei ka Board”.
Kat kum ka jingong jong u, ka pisa kaba la khein ha ka ban ai VRS sha ki Nongtrei kan kot ia kumba T.7.42 klur.
Haba kylli ia ki daw ha lyndet kane ka rai, u Myntri Rangbah ula ong “Ka daw hi ka long ba ka Housing Board hi kam don kam shuh ban trei eiei mynta. Ka dei ka jingdawa kaba la slem bha. Lada ngam bakla kala sahteng la palat 10 snem, ki Nongtrei ruh kila kylli shi kylli naba ka tulop jong ki nongtrei ruh kam long thikna shuh namar ka dei ka Board ba treikam laitluid…kine kiei kiei kila lam sha ka jingkyrpad jong ki Nongtrei ba ki kwah ia ka Board ban khangdam noh bad halor kane ka nongrim, ngi la shim ia kane ka rai”.
“Ia ka Housing Board la pynkha na ka bynta ban ioh ram na ka HUDCO bad LIC bad kine ki dei ki kam kiba naduh u snem 1988-89 hynrei mynta ki Tnad Sorkar bad ki riew shimet kila don shibun ki lad ki lynti ban ioh ia ka ram ka shah. Kumta, ka jingtreikam jong ka Board kam long shuh kaba dang donkam” ula ong.
La ka Sorkar kan shim ia kijuh ki sienjam ia kiwei ki PSU bym treikam ha Jylla, u Conrad ula ong “Hooid, ngi hap ban shong bad bishar bad khmih ia kiei kiei baroh bad ngin shim ia ki sienjam na ka bynta ka jingbha jong baroh”.
