Shillong, Naitung 09 : Ka Khasi Students’ Union (KSU)-East Jaintia Hills, kala pynpaw ia ka jingpyrshah kaba jur halor ka jingai jaka jong ka Sorkar ban tei ia ka jaka mane Blei/Mandir ha ka jaka Sorkar kaba don marsyndap ka Ophis u Deputy Commissioner ha Khliehriat.
Ka KSU hapoh ka jingialam u President Streamly N Suchen bad General Secretary Kwilnis Suchiang, kala buh da ka dorkhas hakhmat u Deputy Commissioner ka District Shivansh Awasthi, ba pyrshah jur ia ka jingai No Objection Certificate (NoC) ban shna ia ka Mandir ki Hindu ha ka jaka ba 500 sqft kaba don marjan u Mot Woh Kiang Nongbah.
Kat kum ka dorkhas, ka KSU kala pynpaw ba ha ka jinglum jingtip jong ka seng, la shem ba kane ka jaka ba thmu tei Mandir ka dei tang ka jaka mane Blei ba shipor jong ki nongtrei surok. Hynrei ka ong ba hadien ba kine ki nongtrei surok kila leit phai, ki don pat ki bar jylla kiba leit tei be-ain ia ka jaka mane Blei ia kaba la dep pynpra ha ki snem bala leit namar ka jingbym ioh jingbit.
“Haduh mynta ka dang don ka jingker da ki tin sawdong ia kane ka jaka bad la ioh jingtip ba ki (bar jylla) la ioh jingbit ia ban tei Mandir ha ka jaka ba 500 sqft bad ki la ioh biang sa 250 sqft ban shna ia jaka leit bar” kala ong.
Ka KSU kala pynpaw ruh “Kum ka Seng, ngi kwah ban phah ia ka khubor ba pyrshah jur ia kane ka rai bad kyrpad ban pynduh pyndam noh mardor ia ka NoC bala ai”.
“Ngi ngeit skhem ba kam long kaba iahap ia ki riew shimet, kynhun, ki society, ne ki kynhun niam ba kin ioh jingbit ban pyndonkam ia ki jaka Sorkar na ka bynta ki kam niam ne kam shimet. Ka jingailad ia kane kan long ka nuksa ka ba lah ban lam sha ka jingiai mih ki jingkyrpad ban pyndonkam ia ki jaka Sorkar da ki kynhun bapher bapher ha ki por ban dang wan” kala ong.
Ka KSU kala ong ba ka jingdon lypa ka jaka mane Blei da ki snem ha kane ka jaka, kala pynkhein lypa ia ki kyndon ain namar ka dei kaba la buh khlem da ioh jingbit, khamtam lei ia ka Meghalaya Public Premises Unauthorised occupation Act 1980
“Ka Seng ka ban jur ba ka Sorkar kam dei ban ai jaka ia kino kino ki kynhun niam namar ka lah ban wanrah ia ka jingniew shiliang bad jingbym iasngewthuh jingmut” kala ong haba bynrap “Ka seng ka maham ba lada ka jingtei iaka Mandir ka iaid sha khmat ka seng kan sa khot ia kiwei pat ki riew shimet ne ki kynhun ba kin pan noh iaki jaka kiba dei jong ka Sorkar ban tei iala ki jong ki iing ne ki jaka mane jong ki hapoh East Jaintia Hills district”.
Ki Nongialam ka KSU kila pyntip ba u Deputy Commissioner ula mynjur ban pynsangeh noh shuwa ia kane ka NoC bad ban dang wad kham bniah ia kane ka kam na ka Sorkar.
