Shillong, Naitung 08 : U Nongialam ka BJP bad Myntri Sorkar Bah AL Hek, ula dawa ia ka Sorkar Pdeng lyngba u Myntri Khynnah George Kurian, ba kan pynrung noh ia ka ktien Khasi bad Garo ha ka khyrnit ba phra jong ka Riti Synshar ka Ri.
U Bah Hek ula pynsngew ia kane ha ka jingialang State Executive Committee bala wan iashimbynta da u George Kurian, kaba long hynne ka sngi Nyngkong ha Ophis treikam ka BJP ha Bivar Road.
Kane ka dei ka jingialang ba nyngkong jong ka State Executive Committee hadien jong ka elekshon Lok Sabha, kaba la iadonlang u President ka Party Rikman G Momin, u MLA ka South Shillong bad Chairman ka MTDC Bah Sanbor Shullait bad kiwei kiwei.
Haba ai jingkren, u Bah Hek ula kyrpad ia ka Sorkar Pdeng lyngba u Myntri Khynnah ban pynrung noh ia ka ktien Khasi bad Garo ha ka khyrnit ba phra haba bynrap “Ka jingpynrung ia kine ki ktien kan pynurlong ia ka jingdawa bala slem bha jong ki nongshongshnong ka Jylla bad kan iarap shikatdei eh ia ki samla pule kiba na kyndong kynshrot ka Jylla”.
Ha kane ka jingialang, la iakren ruh halor kiba plan bad ki prokram bapher bapher ba iadei bad ka roi ka par ka Jylla Meghalaya.
Ha kajuh ka por, u George Kurian ula kren ruh halor ki skhim bapher bapher bala pynkhreh da ka Sorkar u Narendra Modi ia ka Meghalaya kynthup ki skhim ki ban pynjanai ia ka kam ri jingri jingdup, ri dohkha bad kiwei kiwei.
