Guwahati, Naitung 08: U Nongialam ka Congress ba don ha ka Liangpyrshah Rahul Gandhi, ula pynpaw ka jingsngewkhia halor ka jingshah ktah kaba la jubor bha jong ka Jylla Assam ha ka jingshlei um.
“Ka jingshah ktah haka jingshlei hapoh ka Assam ka long kaba sngewsih” ong u Rahul hashuwa ban leit sha Manipur bad ula bynrap “Ki khynnah ba lui lui kum u Avinash kila shah shim noh na ngi”.
U khynnah ba 8 snem u Avinash Sarkar ula hap hapoh ka nala ha Jyotinagar ha Guwahati bad ula shah rah haka um bah namar ka jingshlei um.
Ka jingkhien ba ai u nongialam ka Congress na Assam ka kdew ba palat 60 ngut ki briew kila khlad bad 53,000 ngut kila kylla phetwir bad kumba 2.4 million ngut kila shah ktah namar ka jingshlei um.
Ka jingkhien da u Rahul Gandhi ka pyni iaka jingbym lah ka Sorkar BJP ban tem iaka jingshah ktah ki paidbah haka jingshlei um namar ka BJP kala kular baka Assam kan long ka Jylla ban lait naka jingshlei um.
U Rahul Gandhi ula dawa ban pynbiang ki jingiarap ba kyrkieh bad ban siew bai lutksan iaki paidbah ba shah ktah.
Ula iai ban ba donkam ban thaw daka Pan-Northeast Water Management Authority ban khmih halor ki sienjam ban shim ban tem iaka jingjur ka jingshlei um hapoh ka Jylla.
“Ka Assam ka donkam ban don ka jingiohi jngai kaba kyrkieh halor ka jingwan lynshop ka jingshlei um” ula ong daka ba bynrap “Donkam ban thaw ki lad jingiarap bad ka jingsiew bai lutksan bad ka Pan-Northeast Water Management Authority ban tem iaka jingshlei um”.
Ula kular ban kren ia kane hapoh ka ingdorbar Parliament bad ban pynthikna ba ka sur u paidbah kadei ban kren.
Ula kyntu iaka Sorkar Pdeng ban pynthikna ki lad jingiarap kin poi sha Assam bad haka juh ka por ban iarap iaka Sorkar Jylla naka bynta ban pynkloi ki lad jingiarap iaki paidbah ba shah ktah.
U Myntri Rangbah ka Jylla Himanta Biswa Sarma haka 7 tarik ula ong ba ka donkam daka National Solution ban pynbeit iaka jingshah lynshop ka Jylla haka jingshlei um.
