Nongpoh, Naitung 08 : Ki paidbah ka Western Ri-Bhoi, ha ka sngi Nyngkong, kila iamih paidbah ban dawa ia ka Tnad Forest ka Sorkar Assam, ba kan pyllait noh mardor ia u rangbah Bakstar Diengdoh.
Ki paidbah ka Western Ri-Bhoi kila pynlong da ka rally hynne ka sngi ha Patharkhmah ban pynrem jur ia ka jingsngap jar jar bad jingleh kuman jong ka Sorkar Jylla ban tuklar ia kane ka jingshah kem u Bah Bakstar.
Lah ban kdew hangne, u Bah Bakstar Diengdoh ula shah kem naduh ka 3 tarik Naitung ha ka Tnad Forest ka Assam. La kem ia u na Ophis ka Tnad ha Assam, hadien ka jingphah wan mih ban iakren kam.
U MLA ka thain Bah Sosthenes Sohtun ula pyntip ba ula iakren ia kane ka kam bad u Myntri Rangbah ka Jylla nalor ki bor District ka Ri-Bhoi.
Hashuwa kane ka rally, ki paidbah kila iatur sha ka Ophis u Sub Divisional Officer ka Patharkhmah Civil Sub Division ban aiti ia ka dorkhas bad ban phah tuklar lem halor katei ka jingjia. Hynrei kane ka jingiatur paidbah kala pulom namar ka jingbym don u SDO hapoh ka Ophis.
Haba kren sha ki lad pathai khubor, u samla RC Thangkhiew ula pynrem jur ia ka jingleh ka Tnad Forest ka Assam bad ha kajuh ka por ula pynpaw ia ka jingsngewkhia halor ka jingbym ioh iakynduh ia u SDO.
U pyntip, namar ka jingbym iakynduh ia u SDO, ki paidah kila ria ban leit hiar noh sha Nongpoh ban iakynduh syndon ia u Deputy Commissioner ka District.
