Shillong, Nailar 11: U Nongialam ka NPP bad Symbud Myntri Rangbah ka Jylla Bah Prestone Tynsong ula pyn kynmaw ia ki nongshongshnong ka Jylla ba u Nongialam ka All India Trinamool Congress (AITC) Dr Mukul Sangma ula synshar kum u Hitler ia ka Jylla ha ki phra snem kum u Myntri Rangbah ka Jylla.
U Symbud Myntri Rangbah ka Jylla ula kynthoh ia kane halor ka jingbein jong u Dr Mukul Sangma ia ka Sorkar Meghalaya Democratic Alliance (MDA) baka dei ka Sorkar kaba jem bad kaba leh ia kiei kiei kiba khyllah.
“Nga kwah ban ong hangne ba ka Sorkar kaba khyllah ka dei ka Sorkar kaba ialam da u Dr Mukul ha ka por ba u long u Myntri Rangbah ka Jylla” ong u Bah Prestone.
Haba kyrtiang dien ia ka jingsynshar u Dr Mukul kum u Myntri Rangbah, u Bah Prestone ula ong “Ki Nong shong shnong naduh ki Sengbhalang bad ki kynhun bapher bapher ki tiengiap ia ka sorkar u Dr Mukul…ula synshar kum u Hitler ia ka Jylla”.
U Bah Prestone ula pynkynmaw ba katno ngut shuh ki mynsiem briew kila iap ha ka por ba synshar ka Sorkar u Dr Mukul.
“Nga kwah ban pynkynmaw ia kaei kaba la jia haka por ba u Dr Mukul Sangma …. Ka jingsynshar ka long kaba i shyrkhei bad i ma bha namar ba u trei donbor bad u leh donbor bad wat tang ban kren ban khana than ruh i kumba ym i long shuh, la kumba ngi don ha ka jaka ka bym dei shuh ka ri lajong” ula ong.
Hynrei kane ka Sorkar kaba mynta ka dei kaba plie ia ka jingkhang baroh 24 kynta ia ki nongshongshnong ne kino kino ki kynhun ba kin wan ud wan nam bad iakren ia ki jingeh jong ki.
“Phi la iohi ia ki Kynhun Sengbhalang, ki Nonghikai bad kiwei kiwei, kila wan shakhmat ban iakren bad ka Sorkar halor ki ishu bapher bapher bad kane ka jinglong ba kloi jong ka Sorkar ban iakren, bunsien ngi la ioh ba kheit ia u soh ba thiang” ong u Bah Prestone.
