Rah ka Lyntijam & Umpardong ia ka nam lahduh
Nongpoh, Nailar 11: Ki ar tylli ki kynhun ialehkai football kiba kynthup ia ka kynhun ka Lyntijam jong ki kynthei bad ka Umpardong Fc ki la ioh ban rah ia ka nam kum ki kynhun lahduh ha ka lympung ialehkai football ba la pyniaid da ka United Democratic Party Youth Wings Mawlong Sub Circle ha ka madan ialehkai jong ka Umlakhar.
Ia kane ka lympung ialehkai football ka UDP, la wan ban pynhap pyrda noh da u Samla Eugeneson Lyngdoh, MLA ka Mawphlang Konstituensi kum u kongsan, ha kaba la ia donlang ruh u Bah Balajied Rani, MDC ka Nongpoh, u Bah Donbok Khymdeit, President ka UDP, Ri Bhoi District bad kiwei kiwei ki riew pawkhmat kynthup ki nongkitkam ka Mawlong Sub Circle.
Ha ka jingiakhun ia ka phainal jong kane ka lympung, ha kaba la phiah ruh ha ki ar bynta kawei na ka bynta ki kynthei bad shynrang, ha ka liang ki kynthei ka Lyntijam ka la lah ban pynliem noh ia ka Mawlong Fc da 2-0 katba ha ka liang ki shynrang pat, ka kynhun jong ka Umpyrdong ka la pynliem noh ia ka Kroh da 6-5 kol ha ka jingiakhun kaba la poi sha ka jingiashut ia ka tie breaker.
Haba ai jingkren kum u kongsan, u Samla Eugeneson Lyngdoh u ba dei ruh u wei na ki rangialehkai football ba kynsai jong ka Ri India bad ka jylla hi baroh kawei, u la pynpaw ia ka jingkmen ban sakhilang ia kane ka jingpynhap pyrda noh ia ka lympung ialehkai football ba la pynlong da ka Sub Circle jong ka party UDP.
U la pynpaw ruh, ba ki khun samla ka dong Ri Bhoi District ruh ki don shisha ia kata ka sap ialehkai football kaba kynsai ha kaba u la sakhi hi dalade ha katei ka lympung ialehkai football da kaba kyntu ruh ia ki khun samla ba ki dei ban nang treishitom bad nang pynjanai ia la ka sap ialehkai ka jong ki khnang ba kin lah pat ban kiew ha ka jingim ialehkai ka jong ki, ha kaba u la bynrap ruh, ba kum ki rang bad ki thei ialehkai ki dei ruh ban kiar na ki jingdih buaid kiba sniew kiba lah ban pynjot ia ka lawei ka jong ki.
