Tura, Jylliew 26 : Ki Pulit kila kem ia baroh 5 ngut ki briew bad khot hajir ia u Nokma halor ka jingshah shoh dusmon ka Kynthei briew ha kawei ka shnong jong ka Ri-lum Garo, kaba ka video kala saphriang paidbah lyngba ki rynsan social media.
Kat kum ka khubor Pulit, kane ka jingjia kala jia habar jong ka iingskul kaba don ha ka shnong Lower Teksagre kaba hap hapoh ka Damal Asim Police Station, ha Dadenggre, West Garo Hills.
Kat kum ka khubor Pulit, la iathuh ba kane ka jingjia kala jia ha ka 25 tarik Jylliew ha phyllaw jong ka Iingskul jong ka Shnong.
Hadien ka jingsaphriang ka video, u Deputy Commissioner ka West Garo Hills Jagdish Chelani, ula phah tohkit ia kane ka jingjia bad ki Pulit kila shimkhia mardor.
Haduh ba thoh ia ka khubor, ki Pulit kila ioh kem shuwa ia arngut ki briew na Tengsagre katba lai ngut pat kila phetrieh. Ia kane ka kynthei la ialam sha hospital ban phah sumar.
Ki Pulit kila khot hajir ruh ia u Nokma ba un ai sakhi halor kane ka jingjia.
Na ki khubor ba dang shu ioh, ki Pulit kila ioh kem ia baroh 5 ngut ki briew kiba donkti.
Ki lai ngut kiba phetrieh, kila leit ban pyndem noh ialade hapoh ka Jengjal Police Station bad la wanrah pat ia ki sha Tura ban shah tian bishar.
