Nongpoh, Jylliew 26: Ka Tnad Excise, Ri-Bhoi, ha ka sngi Ba-ar, kala hiar khynra ia ki karkhana shna kyiad be-ain ha ka thain Byrnihat bad khang khyrdep ia kawei ka karkhana baka don ha ka thain Rajabagan, Byrnihat.
Ia kane ka jingkhynra la pynlong hapoh ka jingialam u Superintendent ka Excise, Ri-Bhoi Bah RC Lyngdoh ha ryngkat ka jingiarap lang jong ka Tnad Excise ka Assam.
Ha kane ka jingkhynra, ka Tnad Excise kala lap ia kawei ka karkhana kaba shna kyiad beain ba khlem licence ha ka shnong Rajabagan bad ia kane ka karkhana la khang khyrdep shisyndon.
Kane ka karkhana ka dei ka karkhana barim jong u Cashew Nuts kaba la khang khyrdep naduh u snem 2018 hashuwa ban wan ka khlam Covid-19.
U Bah RC Lyngdoh ula iathuh ba hadien ba ka Tnad kala ioh ia ka jingtip ba thikna ia ka jingdon ki karkhana pynmih kyiad bein ha ka thain Byrnihat, ula bthah ban pynlong ia ka jingkhynra.
U iathuh ba da ka jingiarap lang ka Tnad Excise na Assam, kila hiar khynra sha Rajabagan bad kila lap ia kawei ka karkhana kaba shna kyiad beain bad kurup ruh ia ki kyiad kiba la song ban shalan sha Meghalaya bad Assam.
U iathuh b aka Tnad Excise kala kem ia 12 ngut ki nongtrei bad 2 ngut ki nongpeit jong kane ka karkhana namar kane ka kam beain.
U Rangbah Shnong ka Rajabagan u Bah Anant Timung ula pynpaw ba um don jingtip eiei ruh em halor ka jingdon jong kane ka karkhana shna kyiad ha kane ka karkhana kaba la khang naduh u snem 2018.
