Shillong, Jylliew 21 : Ka kynhun ki shipai Border Security Force (BSF) ha ka janmiet sngi Palei, kila hiar gherao (khynra) ia ka Umkiang Police Patrolling Post, East Jaintia Hills namar ka jingshah kem ki 3 ngut ki shipai.
Kine ki shipai BSF kila shah kem halor ka ejahar jong kawei ka Longkmie na Kuliang, ba kynnoh ba kine ki shipai kila jrong kti bad leh khlem akor ia ka Khun jong ka, kaba dang 15 snem ka rta nalor ka jingshoh dusmon ia u Kurim uba la mynsaw jur na ki bynta jong ka krung.
Halor kane ka ejahar, ki Pulit kila register ia ka case hapoh ka Khliehriat Women Police Station hapoh ka case no 16(6)2024 bad la pynngat ia kine ki shipai hapoh ka kyndon 457/326/354/506/384/34 IPC pule lang bad ka kyndon 7/8 jong ka POCSO Act.
U Superintendent of Police ka East Jaintia Hills, ula pynthikna ia kane ka jingregister case bad pyntip ba ka jingtohkit kala iaid shakhmat ban lah pynithuh ia ki shipai kiba don bynta ban thombor ia kane ka Longiing ha Kuliang.
Kat kum ka khubor Pulit, la iathuh ba haduh 35-40 ngut ki shipai BSF kila leit tur sha kane ka ktem Pulit ha Umkiang kaba hap hapoh ka jingkhmih ka Lumshnong Police Station, haduh ba ki Pulit kila hap ban pyllait noh ia kine ki shipai.
Kat kum ka ejahar jong kane ka Longkmie Kong Martina Pohsna, kine ki shipai kiba phong jain iing, kila wan rung jubor ha Iingsah jong ka bad thombor naphang ia u Kurim ha ka por shiteng miet jong ka sngi Balang bad sngi Palei. La kynnoh ba kine ki shipai kila jrong kti ia ka khun kynthei ba dang 15 snem nalor ka jingpynap suloi bad byrngem siat iap.
Kat kum ka video bala ring da uwei u nongshongshnong, kaba la saphriang ha ki rynsan social media, la pyni shai ba ki BSF kila wan da ka jain iing bad la ioh ba uwei na ki, ula rah da u sdie bad kiwei kila rah da ki dieng bad suloi.
View this post on Instagram
La iohi ruh ba arngut ki kynthei kila pyrshang ban knieh ia une u sdie na une u shipai bad la iohsngew ruh ia ka jingkren ki kynthei ba kyrpad ia ki BSF ban sangeh noh ia ka jingthombor. La iohsngew ruh ia ka kyntien ‘Sir’ ba bun sien ha ka jingkyrpad ia kine ki BSF.
Ha kane ka video la iohsngew ruh ia ki shipai BSF kiba la kren ia ki ktien ba khor bad ktien sih ktien sang pyrshah ia ki briew ha kane ka Iing kynthup ia kine ki shikmie shikhun.
