Shillong, Jylliew 13: U Myntri ka tnat Pule Puthi u Rakkam A Sangma hynne ka sngi Palei, ula leit jurip iaka Captain Williamson Sangma State University ha Balalgre, South West Garo Hills, kaba dang shu plie thymmai.
Ia u Rakkam la synran lang da u nongaibuit ka tnat Pule Puthi Bah H.M Shangpliang, bad ki dkhot ka Meghalaya State Education Commission (MSEC) nalor kiwei kiwei.
Kane ka jingjurip ka dei shi bynta jong ka leit jurip ka kynhun MSEC sha Rilum Garo Hills ban bishar iaka jinglong jingman ka pule puthi hapoh ka thain.
Ka thong jong ka kynhun ka dei ban sngewthuh iaka jinglong jingman ki jaka pule, ban ithuh iaki jingeh bad ban wad ki lad ki lynti ban pynbha iaki.
Ka jingjurip ka kynhun MSEC iaka Captain Williamson Sangma State University ka dei ka sienjam ba ka Sorkar ka shim naka bynta ban kyntiew bad pynbha iaki jingtei kiba kadei bad ka pule puthi.
Haka jingjurip ka kynhun kala bishar bniah iaki jingdon jingem jong ka skulbah, ka kynduh iaki nongpyniaid iaka skulbah, ki heh ophisar bad ka jingdon kam ki paidbah ha kane ka thain.
Ka don ka sienjam bala shim naka bynta ban pynthikna baka Captain Williamson Sangma State University kan biang lut nadong shadong naka bynta ka jingmyntoi ki samla pule.
Ka skulbah kadei ka donkam tam hapoh ka thain ban ai mynsiem iaki samla ban bteng iala ki jingpule bad ka jingjurip kadei ban sngewthuh bad ban wad ki lad lynti ban pynbha shuh shuh.
Kane ka jingjurip kadei ruh ban kyntiew iaka pule puthi hapoh Meghalaya.
Haka jingleit jurip ka MSEC shaka thain Garo Hills kala sangeh ha bun ki jaka pule ban lum jingtip naki jaka pule naka bynta ban leh iaka ba donkam ban kyntiew iaka pule puthi hapoh Meghalaya.
