Shillong, Jylliew 05 : U President ka National People’s Party (NPP), Meghalaya bad Symbud Myntri Rangbah ka Jylla Bah Prestone Tynsong ha ka sngi Balang, ula pdiang ia ka jingdawa jongka Voice of the People Party (VPP) ban tohkit da ka Central Bureau of Investigation (CBI) ne ka Enforcement Directorate (ED) halor ki jingkynnoh bamsap hapoh ka Sorkar Meghalaya Democratic Alliance (MDA).
Haba iakren bad ki nongthoh khubor, u Bah Prestone ula ong “Nga tharai u President ka VPP ula ong ban un bthah ia u MP ba dang shu jop ban pynthikna ba ka ED bad CBI kin wan rung ha Jylla. Kum u President ka NPP bad DyCM ha ka Sorkar MDA, ngi pdiang ia kane namar baroh shikatta kila ju kren halor ka bamsap, bamsap bad bamsap bad nga ruh la ju pynshai bunsien hynrei la I ba kumno ki paidbah ki ngeit ba u Bah Prestone, Conrad ne Sniawbha bad baroh ki Myntri Sorkar ki dei kiba bamsap”.
“Ka jingmut jong nga ka shai bha ba nga don hangne ban pynthikna ba ngan shakri na ka bynta ka jingbha jong ka Jylla. Nga la ioh la ka tulop, ym ba nga um da ka bamsap, ym ba nga ioh iing namar ka bamsap. Lada nga ioh, ngan ong ia phi ba ai ba ki briew kin wanrah da ka jingthoh bad pyni ia nga hangno kata ka bamsap ka don ha ka Tnad ba nga bat lane ki lah ban ujor ejahar bad sa ailad ia ka Iingkashari ba kan shim iala ka lynti haduh ba kut” ula ong.
U Bah Prestone ula ong “Nga la iohi ia ka jingkren u President ka VPP bad nga pdiang ia ka namar kan bha shibun bad ai ba ki paidbah kin tip hangno ka jia kata ka bamsap bad ai ruh ba ki paidbah kins ngetwhuh la kata ka jingkynnoh bala kynnoh da mano mano ruh ka dei kaba shisha ne em, kaba lah pynshong nongrim ne em, ai ba ki paidbah kin sngewthuh bad ai ba ki Central Agency kin wan hapoh ka Jylla..ngi pdiang ia ki”.
Haba kylli, u Bah Prestone ula ong “Phi iohi ka rukom ong jong ki ka long ba kumba ka CBI ka don ha pla jong ki, kumba ka ED ka don ha pla jong ki. Mar syn jop ia ka elekshon ka mut ba ki lah ban wanrah suk bad leit shane shatai, leit sha ki Ophis hala ka mon…ta ka daw nga ong ba wat ma nga ruh nga pdiang ban shah tohkit namar ban shu lapmiet kynnoh bamsap hi, kan bha shibun ba ki paidbah kin tip ia ka jingshisha.
