Shillong, Jymmang 27 : Ka India Meteorological Department (IMD) bad ka State Disaster Management Authority (SDMA) kala bthah ia ki nongshongshnong ba kin phikir bha ialade na ka jingther u lapbah lapsan bad ka eriong ha ki 6 tylli ki District ka Jylla ha kine ki 24 kynta ban wan.
Ka IMD ka pyntip ba u lapbah uba jur uba wan ha ryngkat ka eriong kaba khlain kumba 40-50 kmph haduh 60 kmph, ki lah ban wan lynshop ha ki katto katne ki jaka jong ki 7 tylli ki District ka Jylla ha kine ki 24 kynta ban wan.
Kine ki District ki dei ka Eastern West Khasi Hills, East Garo Hills, North Garo Hills, Ri-Bhoi, South Garo Hills bad West Garo Hills.
Kane ka jingbthah kala mih halor ka jingsyllad jong ka cyclone Remal kaba wan na Bay of Bengal.
Hynnin ka miet sngi U Blei, ha ka por 10:30 baje, ka eriong kala jynrat ia uwei u diengbah ha Chandmari, Tura. Une u dieng ula khyllem happh surok kaba lam sha ka Iingmane Catholic bad pyndkut lut ia baroh ki sainbor bording ha ka thain.
Kane ka lyer kala wan ha ryngkat u slap uba jur, kaba la pynshongdum syndon ia ka thain naduh hynnin ka miet.
Ka MePDCL kala phah ia ka kynhun ban leit jngoh ia ki jingpynjulor ha kane ka jaka. Kila shimkhia ruh ban pynkhuid ia ki dieng bad ban pyndait biang ia ki sainar ban pynioh bording ia ka thain.
