Hato nud kem ki Pulit ia ki Nongialam ka HYC ?
Shillong, Jymmang 26 : U Deputy Commissioner ka East Khasi Hills, ula khot ia ki nongialam ka seng Hynniewtrep Youth Council (HYC) sha ka jingialang ban iakren halor ka kam ki nongshong iing be-ain ha Lum Survey, Shillong.
Ia kane ka jingialang la khot ban pynlong ha ka 27 tarik Jymmang ha ka por 2 baje janmiet hapoh ka kamra treikam jong u Deputy Commissioner.
Kat kum ka shithi khot jingialang bala phah da u Additional Deputy Commissioner (ADC), ka jingkhot iakren ka long tang ia u President bad u General Secretary ka HYC.
Nalor kine, ki ban iadonlang ki kynthup ia u Superintendent of Police ka East Khasi Hills, u Chief Executive Officer (CEO) ka Shillong Municipal Board, u Defence Estate Officer, Guwahati bad u Secretary ka Meghalaya Urban Development Authority (MUDA).
Lah ban kdew hangne ba u President Bah Roykupar Synrem, u General Secretary Isaac Baiasawmoit nalor u Vice President Donbok Kharlyngdoh, ki dei kiba la shah pynngat case halor ka jingleit pynpra ia ki Iing jong ki briew ba shong be-ain ha Lum Survey.
Ia kine ki nongialam ka HYC la register case ha Sadar Police Station hapoh ki kyndon bapher bapher ka Indian Penal Code (IPC) lem bad ka Meghalaya Maintenance of Public Order (MMPO) Act.
Ki kyndon bala pynngat ia kine ki Nongialam ka HYC ki kynthup ia ka 143, 144, 145, 147, 148, 149, 151, 152, 153A, 427, 452, 461, 506, bad 120B jong ka Indian Penal Code (IPC) pule lang bad ka kyndon 6 bad 8 jong ka MMPO Act. Hynrei kine ki kyndon baroh ki dei kiba lah ban bah jamin.
Na ka liang u Symbud Myntri Rangbah ka Jylla ba khmih ia ka kam Pohiing (Police) Bah Prestone Tynsong, ula lum ia ka jingialang ba kyrkieh ha ka sngi Thohdieng ia u DC bad SP bad ula pan kaiphod halor ka jingleit pynpra Iing ka HYC.
