Bun kiba ap result HSSCL (Arts) ki duh ialeh eksam
Shillong, Jymmang 19 : Ka North East Indigenious People’s Forum (NEIPF) Meghalaya Chapter, kala dawa ia ka National Testing Agency (NTA) bad ka Sorkar Pdeng, ba kin pyllait (exempt) shuwa ia ka Meghalaya na ma eksam Common University Entrance Test (CUET) UG-2024.
Ka NEIPF kala dawa ruh ia ka Sorkar Jylla ba kan dawa jur ia ka Sorkar Kmie ba kan tuklar ha kaban phah pyllait shuwa ia ka CUET namar kiba bun ki kynrum kynram kiba mih ha ka jingpynlong ia kane ka eksam ha Jylla bad ka jingduh ruh jong kiba bun ki samla ban iakhun ia ka eksam, na ka bynta ban ioh rung klas.
“Ka NEIPF ka sngewkhia jur ia ka rukom pynlong ia ka eksam CUET ha Meghalaya. Ka NTA kala pynbeit kynrum kynram bha ia ka eksam bad la paw ruh ba kala shu leh tang dep rukom haba peit ia kaei kaba jia ha NEHU Centre” ong u Chairman ka NEIPF Meghalaya Chapter Bah Wellbirth Rani.
Haba sot ia ka jingong ba ka eksam CUET ka dei ka ban rai ia ka lawei jong ki samla ban ioh bteng ia ki jingpule,u Bah Wellbirth ula ong “ Na kine ki eksam bala dep, don bun bha ki samla pule kiba khlem ioh ialeh ia ka eksam khamtam kito kiba wan na nongkyndong ka thain Ri-Bhoi District, West Khasi Hills, South West Khasi Hills bad kiwei kiwei”.
“Kine ki samla kila wan beh ban thoh eksam da ki kali kamai shaduh Shillong bad kito kiba ngat ha NEHU, kiba bun kila leit phai noh namar ka jingbym lah pynlong ia ka eksam ha ka por kaba biang,” ula bynrap.
Nalor kine, ki don bun ruh ki samla pule na ki skul Nongkyndong kim don jingtip shapang ka eksam CUET bad wat ki nonghikai ruh kumno kim tip lano ba ka eksam kan long namar ki jingbym biang ki kor ka juk kum ki Internet bad kiwei kiwei ki lad pathai khubor.
“Ha ka jingshisha ka dei ka kamram jong ka NTA bad ka Sorkar ban pyntip sha ki thain Nongkyndong lyngba ki kor ki bor ba ki don” ula ong
Ha kajuh ka por, u bah Wellbirth ula iathuh ba na ki jingioh lum jingtip, ki samla pule kiba dang ap ia ka result jong ka HSSLC (Arts) (bym pat pynbna result haduh mynta), khamtam kiba dei na ki jaka nongkyndong, kila khlem ialeh ia ka eksam CUET kaba dei ban leh namar ka jingbym tip ba ki hap ban iakhun ia ka eksam watla kim pat ioh result.
“Ki College kila sdang ai phorm rung klas. Kiba bun na kine ki samla kila leit shim phorm hynrei namar ba kim tip ba ki hap ialeh ia ka eksam CUET, kila duh ia ka phorm” ula ong haba buh jingkylli “Shaei ka lawei jong kine ki samla kan poi? Haba maham Nga ima ba kane ka CUET lashai ha ka jaka ban pynkiew ia ki samla shakhmat, kan pynduh mynsiem pynban ban kynran dien”.
Ha kajuh ka por, une u Nongialam ka NEIPF ula ong ba shibun ki kam thurmur jong ka NTA kila paw ha kane ka jing pynlong ia ka eksam CUET haba kdew “ Don ki khynnah kiba pan iakhun ia kawei ka sobjek hynrei ki ioh da kawei pat ka sobjek ha ka admit card”.
“ Ka CUET kam dei ban batai ia ka sobjek kaba kaei u khynnah udei ban shim, ai u khynnah u dei ban rai dalade ia kaei kaba u kwah ne sngewtynnad ban shim” ong u Bah Wellbirth.
U Bah Wellbirth ula dawa ba ka Sorkar Jylla ka dei ban tuklar mardor bad ban kdew ia baroh ki jing duna/jingbym biang na kaei kaba la iohi ne shem na ki eksam kiba dang shu dep pynlong.
Halor ka jingbuh ia ki Centre tang ha Shillong, Tura bad Jowai, u Bah Wellbirth ula buh jingkylli “Kumno ka Sorkar Jylla ka pdiang ia ka CUET khlem da pynbiang ia ki Centre. Ki Centre kila dei ban don ha manla ki District bad Sub Division. Ka long kaba eh ia ki samla pule na ki jaka nongkyndong ban wan beh shaduh sha Shillong, Jowai ne Tura”.
“Kaba ktah eh ka dei ia ki duk ki suk…kila pynlut ia ka bai eksam CUET, bai internet ban sei ia ki Admit Card, mynta sa ka bai kali, bai bam bad kiwei kiwei. Kane ka pynduh mynsiem ia ki samla kiba wan na ki longiing kiba duk” ula ong.
Ha kawei ka liang, u Bah Wellbirth ula kynthoh jur halor ka jingbuh kyndon ka NTA ia ka riam ba dei ban phong ha ka por ba wan thoh eksam. Ula ong “Ka kyndon ka NTA ka dei kaba iahap tang sha ri thor hynrei shane ba khriat, ka dei ban pyrkhat lang.
“Ka Sorkar Jylla ka dei ban peit ia kine kiei kiei baroh bad ban peit ia kaei kaba iahap bad kaba biang tam na ka bynta ki samla pule ka Jylla” ula kynthoh.
Halor ka eksam CUET jong ki Graduate, Post Graduate, ka NEIPF ka dawa ba ka NTA ka dei ban buh noh ia ki centre hapoh Jylla Meghalaya khnang ba ki samla pule na Jylla kin ym donkam shuh ban hap mih leit thoh eksam sha kiwei pat ki Jylla kum sha Guwahati, Gujarat, West Bengal bad ter ter.
