Shillong, Jymmang 08: Ka North Eastern Indira Gandhi Regional Institute of Health and Medical Sciences (NEIGRIHMS) kala trei bha ha kine ki 15 snem kiba la leit ha kaba iadei ban sumar ia kiba don iaka jingpang ha ka snam ba duna ka Hemoglobin ne ka Thalassemia hapoh ka jylla Meghalaya.
Ka Tnad jong ka Transfusion Medicine & Blood Centre ka NEIGRIHMS kala trei shitom ha kine ki 15 snem ha kaba kala lah ban peit ia bad sumar ia ki briew kiba ioh ia ka jingpang Thalassemia da kaba pynbiang bun ‘Unit’ ka snam na ka bynta ka jongki kaba dei ka ‘Red Blood Antigen kaba dei ban iahap bad ka Leuco-Filtered Packed Red Cells, la pynpaw ka NEIGRIHMS lyngba ka kyrwoh khubor hynne ka sngi Balang.
Kala pyntip ruh ba ha ka jylla Meghalaya ki don 39 ngut ki nongpang kiba don ia katei ka jingpang.
Ha ka ri India kumba 4% ki paidbah kidei kiba ioh pateng ia katei ka jingpang bad kiba rah ruh ia kane ka jingpang. Kane ka jingpang kadei kaba ioh pateng da ki khun na la ki kmie ki kpa. Haba ki kmie ki kpa kidei kiba rah ia katei ka jingpang, kumta haduh 25% ka don ka lad ia ki khun ba ha ka por ba kha ia ki ba kin ioh ia katei ka jingpang Thalassemia.
Kumba 50 % na ki khun kidei kiba ioh pateng ia katei ka jingpang na ki kmie ki kpa bad kumba 10,000 ki khunlung kidei kiba lakha bad ka jingpang Thalassemia man la ka snem ha man la ki ri.
Ha ri India, ha kano kano ka por, shi lak ngut ki nongpang kin shaniah ha kaban donkam ban bujli man la ka por ia ka snam jongki, kumta hashwa ba ki shi kurim ki don jingthmu ban ioh khunkanbha shibunia kiba kin leh iaka test na ka bynta ban lap la ki don ne kim don ia ka jingpang Thalassemia, la pynpaw ka kyrwoh bad ka bynrap ba lada jia ba baroh arngut ki kmie ki kpa kidei kiba don ia ka jingpang, kan long ruh kaba bha shibun ban leh test lang ia i khunlung iba dang don hapoh kpoh.
