Shillong, Risaw 19: Ka Central Puja Committee (CPC) kala kyrpad ia ki nongshong shnong ha kylleng ki bynta jong ka Meghalaya ban pynneh ia ka shongsuk shongshngain ha ka jingrakhe ia ka Durga Puja, ha kaba ki bor pyniaid district bad ki pulit kila shimkhia ban pynkhlain ia ka jingpahara hadien ba kala don ka jingwiang ding ha ka thaiñ Mawbah.
U President ka CPC u Naba Bhattacharjee ula kyrpad hadien ba kala don ka jingialang bad u Chief Secretary bad ki heh ophisar sorkar. Ka jingialang kala pynleit jingmut ha kaban pynkhlain ia ki lad ai jingiada na ka bynta kine ki sngi kiba dang sah jong ka jingleh Puja, khamtam eh ha ki por dang step phyrngab bad ha ki sngi ba khatduh jong ka jinglehniam ban bret blei.
U Bhattacharjee ula ong, ba ki bor kiba dei khmih kila shimkhia mardor ia ka jingkyrpad jong ka committee ban pynjur ia ka jingpahara bad ban weng ia ki jingsheptieng jong ki paitbah.
“Ka dei na ka bynta ban pynkhlain ia ki lad jingiada ha ka por puja bad ha ka por bret blei bad khamtam eh ha ki por dang step phyrngab, khnang ba ki riewngeit kin ioh ban leit sha ki puja pandal bad rakhe da ka jingkmen ia ka Puja ha kine ki 2 sngi kiban wan” la ong u Bhattacharjee.
Haba banjur ia ka jinglong jingman jong ka imsuk imsain hapoh ka nongbah Shillong, ula kyntu ia ki paitbah na ki jaidbynriew bapher bapher ban rakhe da ka jingkmen bad ka jingsuk ia kane ka jinglehniam bad ban iatreilang ruh bad ki bor kiba dei khmih.
“Nga tharai baroh ki kwah ba kane ka jingrakhe ia ka puja da ka jingsuk jingkmen, khlem da niew ia ki nongshong shnong, la kidei na kano kano ka jaidbynriew ne kano kano ka jingngeit kaba ki don. Ka Shillong kala pyni ba ka don ka jingia imsuk imsain hapdeng ki paitbah ki bapher bapher hynrei ha man la ka imlang sahlang, ki shnong ki thaw bad ki nongbah, kin don pat ki briew kiba leh pyrshah ia ka imlang sahlang” ula ong.
U Bhattacharjee ula kyntait ruh ia ka jingkam ba kala don ka jinghiar ha ka jingiashimbynta ha kane ka puja. Ula ong ba ki puja pandal ha kylleng ka Shillong, kynthup ia kito kiba don ha Keating Road bad Oakland Road, kumjuh ruh ka Gorkha Durga Puja pandal, kila iai bteng ban khring ia bun bah ki paitbah na kylleng.
Ula ong, ba ka jingjia kaba rit ka lah ban pynsheptieng, hynrei ki paitbah kila ia mih khrui ban rakhe ia kane ka jinglehniam.
Na ka liang jong ka Central Puja Committee, u Bhattacharjee ula ai khublei kyrpang ia ki paitbah ka jylla Meghalaya bad ka kitbok ia ki ba kin ioh ia ka Durga Puja kaba kmen bad kaba seisoh.
