Shillong, Jymmang 08 : U Myntri Rangbah ka Jylla Conrad K Sangma ula pynrem ia ka jingkynthoh bein Jaidbynriew jong u Nongialam bala rangbah bha jong ka Congress Sam Pitroda, uba la ong ba ki paid nongshongshnong ka Thain Shatei Lam Mihngi ki iasyriem ia ki nong China.
“Kane ka jingkynthoh kaba mih na u Nongialam ka Congress Sam Pitroda ka dei kaba sngewsih bad kala ktah bha ia ka jingsngew jong ki paidbah ka thain Shatei Lam Mihngi bad kumjuh ruh ia ki nongshongshong jong kiwei pat ki bynta jong ka Ri” ong u Conrad hynne ka sngi Balang.
“Kum u briew na ka thain Shatei Lam Mihngi, ngi la iohi bad mad ha ki snem bala leit noh, ha ki phew snem, kila mih shibun jait ki jingibein pyrshah ia ki paid ka thain Shatei Lam Mihngi bad ngi la kyrmen ba ngi la jam palat ia kane mynta hynrei haba ngi iohsngew ia ka jingkren u nongialam ka Congress ha ka sur kaba ibein bad pynjah burom, ka da pynmong shisha ia ka jingsngew ki briew jong ngi bad kam pher la ki mut kumno kumno ruh, ki jingkren kum kitei kim dei kiba pynsngewtynnad ia ki paidbah jong ka Ri” ula ong.
Haba pynkynmaw ia une u Nongialam ka Congress ba ka India ka dei ka Ri kaba sah bun ki Jaidbynriew, u Conrad ula ong “Ka nongrim jong kane ka Ri ka shong ha ka jingdon bun jait ki jaidbynriew la ka dei ha ka kolshor , ka ktien ka thylliej, ka jinglong ka durkhmat bad kiwei kiwei bad kane ka pynlong ia ka India kumba ka long hynrei haba phi sdang ban niewbein bad kren ia kum kine ki jingkren, kane ka iaid pyrshah ia ka jingmut jong ka India. Kumta, nga da sngewmong shisha bad ngi pynrem jur ia kum kane ka jingkren jong une u Nongialam ka Congress Sam Pitroda”.
Halor ka rai jong ka Congress ban pynjngai ialade na ka jingkren u Pitroda, u Conrad ula ong “Ka Congress party kala pyn jngai ialade na ka jingkynthoh hynrei jin lada dei u briew uba rit, u nongialam, u dkhot lehse ka lah ban pynjngai satia ialade na kane ka jingkynthoh hynrei hangne ngi kren ia u Nongialam uba la rangbah bha ha ka party, u dkhot uba la treilang bad u Myntri Rangbah Duh barim ka Ri, uba don bynta bad ka Sorkar ha ki snem bala leit noh, u briew ha katei ka kyrdan ban ai jingkren ka mut ruh ba dei ka nongrim jong ka Congress party halor ki katto katne ki ishu”.
Haba kylli, u Conrad ula ong “Khlem pep, kumba nga la kren ha ki por bala leit noh ba ka India ka dei ka Ri kaba don iaki Jaidbynriew bapher bapher bad ngi la iohi ha bun ki khep ha ki snem bala leit noh ha kaba ki briew khamtam na ka thain Shatei Lam Mihngi kila mad ia kum kine ki jingshah ibein bad kum kine ki jingkren ki dei kiba pynmong bha”.
“Kumta, haba ka mih na u Nongialam bala rangbah ka Congress, kala nang pynmong shuh shuh bad kumba nga ong, kane kam iaid satia ha ka lynti ba pyrshang ban wanrah ia ka jingialong kawei ha ka Ri” ula ong.
