Shillong, Jymmang 08 : Ha ka jingkhynra bapher bapher bala pynlong ha ka 7 tarik Jymmang, ki shipai BSF ka Meghalaya Frontier kila ioh ban pynpulom ia ka jingpyrshang khaii tuh ha khappud ka India-Bangladesh bad ioh kurup ia ki masi, shini bad ki jingtah pynbhabriew kiba shongdor haduh T. 15 lak.
Halor ki jingtip kiba thikna, ki shipai BSF ka 4 Bn kila ioh ban kurup ia bun bah ki jingtah pynbhabriew na khappud ka East Khasi Hills District. Ia kine ki tiar la aiti noh sha ki bor ka custom ba kan leh ia kaba donkam.
Kumjuh ruh ki BSF ka 193 Bn, kila ioh ban kurup haduh 8 tylli ki masi na khappud ka Dulainala, kaba thmu ban khaii tuh sha Bangladesh.
Nalor kine ki jingkhynra, ki BSF ka 200 Bn ha ryngkat ki Pulit, kila ioh kurup ia bun bah ka shini, kaba la pynlong ha kawei ka Iing bym sah briew, kaba don hajan ka khappud ka South Garo Hills bad Bangladesh.
Ia kane ka shini la aiti noh sha ki Pulit ka Rongra Police Station ba kan leh ia kaba donkam.
