Shillong, Jymmang 07 : Ka Khasi Students’ Union (KSU) bad ka Jaintia Students’ Union (JSU) ha ka sngi Ba-ar, kila dawa ia ka Sorkar Jylla ban pynlong biang sa shisien ia ka eksam NEET na ka bynta ki samla pule ka Ri-lum Jaintia, namar ki jingkynnoh bakla ai ia ki jingkylli ha ka eksam ba long myn ha ka sngi U Blei.
Ha ka mudui sha u Myntri ka Tnad Pule Rakkam A Sangma, ka KSU bad JSU kila ong “ Ni kyrpad ban pynlong biang sa shisien ia ka eksam NEET da kaba pyrkhat ia ka hok bad ka bha ka miat jong ki samla ba iakhun ia ka eksam” .
Kila kynnoh ba kila iohi ia shibun ki jingleh bakla ha ka sngi ba pynlong ia ka eksam NEET myn ha ka 5 tarik Jymmang ha Jowai, West Jaintia Hills District.
“Haba ngi iaroh ia ka jingshimkhia jong ka Sorkar ban pynlong ia ka eksam ha ka sien ba nyngkong eh ha Ri-lum Jaintia, ngi sngewkhia jur ia ka jingleh bakla kaba la ktah ia kumba 400 ngut ki samla pule, kiba iakhun ia ka eksam. Ngi la ioh ia ki jingtip ba ha ka por thok eksam, ki samla kila ioh ia arset ki jingkylli bala thoh MNOP bad QRST. Kane kala pynbakla ia ki nongialeh eksam bad wat ki nongpyniaid eksam kila sah ha ka umdum ba ia kano ba set ba dei ban thoh” ong ka mudui.
Ka mudui ka ong ba hadien, la pynshai ba dei ka set na ka QRST kaba dei ban jubab, kaba la ktah jur ia ki samla kiba la pynlut ia ka por ban thoh nyngkong shuwa ia ka set MNOP. Nalor kata, watla kala don ka jingpyrshang jong ki katto katne kinongialeh eksam ban pan jingshai naki nongpyniaid eksam, hynrei kim shym la ioh jingshai satia. Nalor kane, ym shym la shah ruh ia ki samla pule ba kin aiti ia ki admit card tad haduh ka por janmiet ha kaba bun ki samla kiba dei na ki jaka ba jngai, kim shym la ioh shuh ban aiti ia ki admit card haduh mynta.
Kine ki arseng kila ong ruh ba bun ki samla pule kiba iakhun ia kane ka eksam kila pynlut por bha ia lade ha ki jingpule, kila trei shitom bad pynlut ruh ia ka pisa tyngka ban pynkhreh ia ka eksam da ka thong ba kin ioh rung klas ha ki jaka pule Medical ban leit pule MBBS.
“Namar kata, khnang ban don ka jinglehhok bad ban ailad kumjuh ia baroh ki samla pule, la donkam ban pynlong biang sa shisien ia ka eksam ha kaban pynbeit pat iaki jingleh bakla” kila dawa bad pynpaw baka long kaba donkam leh eiei ruh ha kaban tehlakam ia kum kine ki jingjia ba dang iai jia biang.
