Aizawl, Jymmang 05 : Kawei ka khynnah kynthei ba kyrtengka Lalbiakthangi kala ioh ia ka jingithuh kum ka riewshlur hadien ka jinglah jong ka ban pyllait im ia iwei I Khunlung ba dang 4 snem ka rta, na ka iing kaba pluh ha ka janmiet sngi Thohdieng.
Kane ka jingjia kala jia ha ka shnong Chhippui, kaba don ha khappud ka Mizoram bad Bangladesh bad ba hap hapoh ka Mamit District.
Kat kum ka khubor, u Heprit Jacob Laldinsanga, ba dang saw snem, u don marwei ha iing ha ka por ba pluh ka iing namar ka Kmie Lalbiakmawii ka dang leit kai sha ki iing ba marjan. Ka Lalbiakthangi, kaba sah marjan, ka dei kaba nyngkong ban iohi ia ki thylliej ding ha ka por 6:45 baje janmiet bad mar mar kala mareh sha kane ka Iing ba pluh.
Namar ka jingbym lah ban rung na ka jingkhang khmat, kane ka Khynnah kala kiew na ka khalaki bad leit pyllait im ia une u Khunlung. Ka ding kala bam duh lut khoit ia kane ka Iing kaba dei jong u Zothanga.
Ka Kmie ka Lalbiakthani, ka Remi, kala iohsngew ia ka jingpyrta ka khun ba pan jingiarap bad mar mar kala leit sha kane ka jaka bad ryngkat lang, kila lah ban sei ia une u Khunlung na ka khalaki. Hadien kane, kane ka khynnah kala rung biang na ka khalaki ban pyllait im pat sa ialade bad kala ioh mih khlem kano kano ka jingmynsaw watla kala duh tang ia ki juti ha ka ding.
