Shillong, Jymmang 03: U Myntri ka tnad Bording ka Jylla Abu Taher Mondal, hyne ka sngi Thohdieng, ula leit jurip ia ka Jingkieng Umiam ban peit ia ka jingiaid ki jingtei maramot bad jing pynkhlain ia ka Damsite.
Ha kane ka jingleit jurip la iadonlang u Sanjay Goyal u Chairman cum Managing Director jongka Meghalaya Energy Corporation Limited (MeECL), Commissioner & Secretary ka tnad Bording R Majaw bad kiwei kiwei ki heh Engineer jongka Meghalaya Power Generation Corporation Ltd (MePGCL).
U Myntri Sorkar uba la leit ban jurip ia ki kam bala pyntrei bad shongbishar ruh ia ka jingiaid jong ka kam, ula kdew ka jingshna pynkhlain ia ki jingtei ka long ban nang pynskhem iaka Dam kaba la kynjoh palat 50 snem.
U Mondal ula ong, “Nga dap da ka jingkmen ban iohi ba ki kam ki jam kila iaid bha shakhmat ha ka jingshna pynbha ia ka dam bad ia ka jingkieng. Kane ka long kaba kongsan bha na ka bynta ban kyntiew ia ka rta jong ka dam sa 25-30 snem. Ka tnad kala trei ha baroh ki liang ban pynthikna ba kan ym don kano kano ka jingiapein ha kaba iadei bad ka jingshngain jong ka Dam bad ka jingkieng watla ngi la trei ban pyndep ia kane ka kam hapoh ka por kaba la buh. La pyrkhing ia ka jingiaid ki kali ban pynthikna ba kan don ka jingiaid beit iaid ryntih jong katei ka kam maramot bad ban pynbha. Nga kyntu ia ki paidbah ba kin long kiba iai shah namar kane kan aijingmyntoi hi ia ki paidbah ha kip or kiba nwan” .
U Sanjay Goyal ula ong, “Ngi la shimkhia ruh ia ka kam na ka bynta ban pynbha ia ka jingkieng bad dei na kane ka daw ba kala shimpor bad ngi la pyrkhing iaka jingkit ia ki mar kiba khia bad kumjuh ia ka jingiaid ki kali ha ka por ba dang don ka jingmaramot. Ngi don ia ka jingsngewkhia halor ka jingpynthud ia ka leit ka wan hynrei kadei pat na kabynta ka bha ka miat jong ka jingtei baroh kawei”.
Kane ka project kadei naka bynta ban pynkhlain bad ban pynskhem bha ia ka dam bad ban maramot ia ka jingkieng bad kane ka jingmaramot ym tang ba kan iarap ha kaban kyntiew iaka rta jong katei ka jingtei hynrei ban pynthikna ban lah ban pynmih ia ka bording lyngba katei ka jingtei bad ka dam ryngkat bad ka jingkieng kim shim la don satia kano kano ka jingshah ktah.
U Myntri ka tnad Bording ula iakren ruh bad ki heh Ophisar bad Engineer na ka bynta ban shim ia ki lad jingiada ha ka jingtrei ia ka kam bad ban kyntiew ia ka jingim bad ia ka jingpynmih bording na katei ka dam.
