Shillong, Jymmang 03: Ka Langsning FC hynne ka sngi kala pynrem ia ka Ryntih SC da 5-1 ha ka Shillong Premier League 2023 kaba la long ha SSA Stadium, First Ground, Polo.
Mar ia sdang ka jingiakhun ha ka kylla step, ka Ryntih kala ioh thep shi kol lyngba u Aatish Rai ha ka minit kaba 17 hynrei ka Langsning kala ioh ban thep 2 kol lyngba u Wilberth Marbaniang ha ka minit kaba 42 bad u Dapmonlang Pathaw ula thep ia ka kol ha ka minit kaba 49.
Ha ka kylla miet ka Langsning kala bteng biang ban ialehkai bha bad kala ioh ban thep ia ka kol lyngba u Dawandappura Biam Pathaw ha ka minit kaba 60, u Kordor Dkhar ha ka minit kaba 84 bad u Wilbert Marbaniang ula ioh thep ia ka kol ka baar ka jongu ha ka minit kaba 87.
Ha kane ka jingiakhun 2 ngut ki nongialehkai ka Ryntih kila hap ban mih noh na ka madan ialehkai halor ka jingiania bad u Referee kiba kynthup ia u Wanshan Dkhar bad u Kamran Farooque da kaba ioh amr ar tylli ki yellow card.
Ka Langsning mynta kala don ha ka kyrdan kaba 3 da kaba kami 15 point bad kala ia ryngkat bad ka Shillong Lajong FC kaba dang sah sa kawei ka jingiakhun ha kti.
Ha ka sngi Saitjaiñ ka jingiakhun kan long hapdeng ka Mawlai SC pyrshah ia ka Nangkiew Irat SC ha ka por 3:15 mynsngi bad ka Mawlai mynta ka don ha ka kyrdan kaba 4 da kaba kamai 13 point.
