Shillong, Jymmang 03 : Jan kumba 4000 tylli ki phone call lah ioh ban pdiang hapoh ka CM-Connect, ka helpline ia ki paidbah ka Jylla ban pynpaw ia ki jingsngewkhia bad ki jingeh beit beit sha ka Sorkar, ha kine ki khyndiat bnai bala leit.
Haba pyntip ia kane hynne ka sngi Thohdieng hadien ka jingialang, u Myntri Rangbah ka Jylla Conrad K Sangma ula ong “Hapoh ka CM-Connect prokram, ki don lai bynta kiba ngi la buh bad ha ka bynta ba nyngkong, ka dei ka call centre kaba ngi la pyntreikam. Ngi la ioh pdiang haduh 4000 tylli ki phone call ha kine ki khyndiat bnai bad ngi la iohi ia u nombor ba ula nang kiew”.
“Ka bynta kaba ar ka dei ka Public Hearing, ha kaba u CM un iakren beit beit bad ki riew paidbah. Kine ki Public Hearing kin sa long ha ki Block bapher bapher ha ka jingiadonlang ki Ophisar ka Sorkar” ula ong.
U Myntri Rangbah ula iathuh ba ka bynta kaba bnai ka long ka CM-Connect kan don ia ki Ophis ha kylleng ki jaka jong ka Jylla ha kaba ki paidbah ki lah ban leit sha kine ki Ophis bad aplai ia ki skhim, shim ia ki jingtip bad aiti ruh ia ki jingujor.
