Shillong, Iaiong 02 : Kawei ka kali Bolero jong ka Tnad Water Resources kala ingkhong khait na ka jingshah kawang petrol bomb hynne ka miet sngi Palei.
Kane ka kali ka dei kaba don u nombor ML01A-0175, ong ki Pulit kiba iathuh ba ki runar kila wan kawang petrol bomb ia kane ka kali katba dang pynieng hakhmat ka office.
Ki Pulit ki iathuh ba arngut ki samla kiba shong da ka scooty, kila kawang ia u petrol bomb ha kane ka kali kaba dei jong u Deputy Chief Engineer ka Tnad Water Resources.
Kane ka jingjia kala jia ruh tang shisngi hadien ba u Deputy Commissioner ula pynmih ia ka jingbthah ia baroh ki Ophis Sorkar ba kin husiar bad phikir bha iala ki nongkynti ba kin buh ha ki jaka kiba shngain kynthup ki kali.
Ki Pulit kila register case halor kane ka jingjia bad ka jingtohkit mynta kala iaid shakhmat.
