Shillong, Iaiong 28 : Ki bor District ka West Garo Hills, kala bthah ia baroh ki skul hapoh ka District ba ki dei ban pynlong skul tang hapoh ka 10:30 baje mynstep bad ba ym dei shuh ban shim klas naduh 11 baje haduh 3 baje janmiet namar ka jingshir kyr-ang palat ka sngi.
Ka bor district kala pynmih ia kane ka hukum kum shibynt ban pynthikna ia ka bha ka miat jong ki khynnah skul, ki nong hikai bad ki nongtrei. La ong ba kane ka hukum kan treikam tad haduh ka 1 tarik u Jymmang.
La khang ruh ia ki skul ba kin pynlong ia ka jingpynieng lain (Assembly) ha ka por mynstep tad haduh ka 1 tarik Jymmang.
Kat kum ka hukum, ki skul kim dei ban shim klas hapdeng 11 baje myntep haduh 3 baje janmiet. Ia ki skul Upper Primary, Secondary bad Higher Secondary school, ka jingshim klas kan long hapdeng 6:30 baje mynstep haduh 10:30 baje mynstep ha kaba la aibor kylluid ia ki nongpyniaid skul ba ki lah ban khang ia ki skul lada ki sngew donkam.
Na ka bynta ki Nursery bad Lower Primary, la hukum ban khang naduh ka por 10:30 mynstep jongka 29 tarik Iaiong tad haduh ka 1 tarik Jymmang 2024.
Kala ieh ruh ha ka bor jong ki nongpyniaid skul ban rai ia ka jingpyndih dawai wieh ia ki khynnah skul Lower Primary la kan long ha ka 29 tarik Iaiong lane ha ka 2 tarik Jymmang.
La bthah ia ki khynnah skul ba kin tap tupia lane kup shatri ban iada ialade n aka sngi bad ki skul ki dei ban pynthikna ha kaban pynioh ia ka umdih bad kiwei kiwei ki jingdih pynpynngad.
