Agartala, Iaiong 29 : Ka Sorkar Tripura ha ka sngi U Blei, kala pynjlan ia ka jingai shuti ia baroh ki skul sa lai sngi naduh mynta ka sngi Nyngkong khnang ban pyllait ia ki khynnah skul na ka jingshit kyr-ang ka sngi.
Ka jingshit ha Tripura kala tam hapdeng 4 haduh 6 degree Celsius na ka jingshit ba ju long baroh shi katta ha kine ki artaiew bala leit noh.
Ka Sorkar Jylla kala rai ban pynjlan ia ka jingai shuti ia baroh ki skul Sorkar, ki skul bad iarap ka Sorkar bad ki skul shimet naduh ka 29 tarik Iaiong haduh ka 1 tarik Jymmang.
Kat kum ka hukum, la bthah ia baroh ki District Education Officer ba kin pyntip ia kane ka rai sha baroh ki skul hapoh u pud u sam jong ki.
Shuwa kane, ka Tnad Pule Puthi ka Jylla, namar ka jingshit palat ka suinbneng, kala pynbna shuti ba saw sngi kata naduh ka 24 tarik Iaiong haduh ka 27 tarik Iaiong.
Kat kum ka Indian Meteorological Department (IMD), ka jingshit jong ka suinbneng kan dang iai bteng ha kine ki khyndiat sngi ban dang wan.
