Shillong, Iaiong 23: Ki Pulit ka East Khasi Hills ha ka sngi Ba-ar, kila kem ia arngut ki briew kiba suba donkti ha ka jing pyniap ia ki nongbylla bar jylla dang shen ha Ichamati bad ha Mawlai Mawroh.
Kat kum ka khubor Pulit, uwei na kine kiba shah kem u dei na Mawlai bad uwei pat u dei na Nongthymmai.
“Uwei na ki la kem halor ka jingjia ha Ichamati bad uwei pat halor ka kam pyniap ia u nongbylla ha Mawlai Mawroh” ong uwei u Heh Pulit.
Ha ka 2 tarik Iaiong, arngut ki dkhot ka KSU (KSU) kila shah kem halor ka jingkynnoh donkti ha ka jingpyniap ia ki arngut ki nongbylla bar jylla ha Ichamati, East Khasi Hills.
Kine ki dei kiba la ithuh kum u Shambor Shati (26 snem) na shnong Wah Utim bad u Meshadapbor Skhembill uba dei na Saitsohpen, Sohra.
Ha ka 27 tarik Lber, arngut ki nongbylla bar jylla kila shah bomiap ha ki riew runar ha Ichamati. Kine ki arngut ki kyrteng u Esan Singh bad u Sijit Dutta. Baroh arngut ki dei ki nongbylla par mawshun. Ia ka met jong ki la lap na Ichamati bad na Dalda.
Kat kum ka ejahar bala mudui da ki bahaiing jong kine ki arngut, kane ka jingjia kala jia hadien bala wai ka jingialang pyrshah CAA ha Ichamati.
Ha ka 10 tarik Iaiong pat, uwei u nongbylla bar jylla ba kyrten gu Arjun Ray (52 snem) ula iap na ka jingmynsaw kaba jur hadien ka jingshah bom shah tied ha ryngkat bad arngut kiwei pat ha ka kynhun ki riew runar ha Mawlai Mawroh.
Ki pulit ki pyntip ba katto katne ki riew kila shoh ia kine ki nongbylla kiba trei bylla ha kawei ka Iing ba dang shna thymmai ha Lumsohkhlur, Mawlai Mawroh bad kine ki runar kila pan ia ka Labour Licence na kine ki nongbylla bar Jylla.
