Shillong, Iaiong 09: U President ka United Democratic Party (UDP) Bah Metbah Lyngdoh ula ban ba ka Sorkar Jylla ka dei ban shim khia ha ka ban khot iakren biang iaka seng Hynniewtrep National Liberation Council (HNLC).
“Nga sngew baka Sorkar Jylla ka dei ban shim biang ka sienjam ban khot iakren iaka HNLC” ong u Bah Metbah haba kren shaki lad pathai khubor hadien ba pyllait iaka Manifesto jong ka Regional Democratic Alliance (RDA) naka bynta ka elekshon MP sha Lok Sabha.
U Bah Metbah ula ong baka Sorkar Jylla ka donkam ban bteng iaka jingiakren iasuk bad ka HNLC naka bynta ban lah pynthikna ha ka ban pynneh iaka suk ka sain hapoh ka Jylla.
Kane ka jingiakren iasuk ka dei ruh kawei napdeng ki bun tylli ki mat kular ka RDA naka bynta ka elekshon MP.
Ka HNLC kala weng noh ialade naka jingiakren iasuk bad ka Sorkar Jylla daka ba kynnoh baka Sorkar kam shym la lah ban pynurlong iaki 5 tyli ki mat jingdawa khamtam ban map noh iaki kam beain ki dkhot ka HNLC.
Haba kylli u Bah Metbah ula ong “Ka ain kan leh iaka ba donkam. Nga sngew ba kam iahap ia nga ban shu kdew kti, mano ba leh, kiei ki la leh. Kam iahap ia nga ban kren khlem pat dei por”.
Haba iadei bad ka ILP, u heh ka UDP ula ong ba kane kadei kam kadei ka mat jong ka Sorkar Jylla.
“Haba iadei bad ka ILP bad ki sienjam ban bud, kadei ba hap iaid ruh lyngba ka Jylla bad haka kyrdan Sorkar Pdeng” ula ong.
