Umsning, Iaiong 08 : Ka Kyrtong ka NPP na Shillong Parliamentary seat, Kong Ampareen Lyngdoh, kala beh ia ki nongkyrshan ka Voice of the People Party (VPP) na ka jingialang paidbah ha Umsning haba kynthoh jur ba ka VPP ka dei ka seng sain pyrthei ba khlem nongrim.
Kane ka jingkynthoh kala mih hadien ba ki nongkyrshan ka VPP kila wan sha ka jingialang bad pynthut ia ka jingialap elekshon ka NPP da kaba pyrta “Ha u Prah..Ha u Prah”.
“Phi ki Nongkyrshan u Prah khie leit noh sha la iing namar phi la ioh ia ka lad ban ia lum mynne mynsngi, khie leit noh sha iing ioh mih kano kano ka jingklumar ne jingmynsaw” ong ka kong Ampareen hapdeng ka jingialap elekshon.
La sakhi ruh ba katba ki Nongkyrshan ka NPP ki dang ia sngap bha ia ka jingialap elekshon I kong Ampareen, kala mih kynsan ka jingkynhoi na ki nongkyrshan ka VPP ha kane ka kyllimap kala mih ka jingiajrong kti mar kylliang hapdeng ki nongkyrshan ka NPP bad ki nongkyrshan ka VPP.
“Phi ki nongkyrshan jong ka party ka bym don nongrim, khie leit noh sha la iing bad peh ia u prah u jong phi katba phi mon”, ong ka kong Ampareen.
Hadien bala wai ka jingialang, ka Kong Ampareen shuwa ban mih naka jingialang, kala hap hiar na kali ban pynjai jai ia ka jingiakynad hapdeng ki nongtrei ka party NPP bad ki nongkyrshan ka VPP kiba la iajrong kti.
Hynrei ia kane ka jingiakynad bad jingiajrong kti la lah ban tem noh da ki Pulit ka Umsning Police Outpost kiba la rah ruh ia ki katto katne ngut sha thanad.
 na ka jingialang paidbah ha Umsning haba kynthoh jur ba ka VPP ka dei ka seng sain pyrthei ba khlem nongrim.){kind=link}