Shillong, Iaiong 04 : U Nongialam ka BJP bad Myntri Sorkar Bah A.L.Hek ula ong ba ka National People’s Party (NPP) ka khlem leh satia ia kano kano ka kam kaba long pyrshah ia ka party.
“Ngam iohi ia kaei kaei ruh kaba ka (NPP) ka leh ba long pyrshah ia ka BJP” ong u Bah Hek haba iakren bad ki nongthoh khubor.
Hynrei, dang ha ka sngi Balang, u Vice President ka BJP-Meghalaya bad MDC ka Tura Bernard N Marak ula dawa ia u MLA ka NPP na Mahendraganj Sanjay A Sangma, ba un panmap namar ka jingpynmong ia ka jing sngew jong ki nongkyrshan ka BJP ha Ri-lum Garo da kaba kam ba ka “NPP kala pynkut ia u kyrtong ka BJP”.
Haba kylli, u Bah Hek ulaong ba ka jingkren jong uwei u briew kam mut satia ba dei ka jingkren jong ka party baroh kawei. “Kane ka dei ka jingkren jong uwei u briew, ngim lah ban kynnoh ia ka NPP” ula bynrap.
Nalor kane, une u Nongialam ka BJP ula ong ba ia kane ka kam la dep ruh ban iakren bad u National President ka NPP Conrad K Sangma.
“Namar kata, nga kyrpad ia ki paralok ka NDA ba kin kiar na ka jingkynthoh eiei pyrshah ia ki nongkitkam ka BJP” ula bynrap.
Haba pynpaw ba ka NDA kala buh thong ban jop 400 seat ha ka elekshon Lok Sabha ban wan, u Bah Hek ula ong “Ka thong jong ngi ka dei ia ka BJP ha ryngkat ki paralok ka NDA ba kin jop 400 seat”.
Haba kylli la ka BJP ka phaikhmat sha ka shuki Rajya Sabha na Meghalaya, u Bah Hek ula ong ba um don jingtip satia ia kane namar ka jingiasngewthuh jingmut ka don bad ki Nongialam na Delhi ym ka BJP na Meghalaya.
“Phi i, kane ka dei ka elekshon ha baroh kawei ka ri India, kam dei ka elekshon Meghalaya, ban shim ia ka rai, ka dei ia kaban shim da baroh ki paralok ba iatreilang, ka paralok ba iatreilang kam dei tang ka NPP” ula ong.
 ka khlem leh satia ia kano kano ka kam kaba long pyrshah ia ka party.){kind=link}