Shillong, Iaiong 02 : U Symbud Myntri Rangbah ka Jylla ba khmih ia ka tnad kam pohing (Police) Bah Prestone Tynsong ha ka sngi Ba-ar, ula kyntu ia ki Sengbhalang trai Jylla ne bar Jylla, ba kim dei ban jam palat ia u pud namar ka Ain kan ym map satia iano iano ruh kiba donkti ha ka jingpyniap ia ki arngut ki nongbylla bar jylla ha Ichamati, East Khasi Hills.
Kane ka jingkynthoh kala mih hapoh shisngi hadien ka jingkem ki Pulit ia arngut ki dkhot ka KSU ba suba donkti ban pyniap ia kine ki nongbylla bar jylla.
“Ka khubor ka long kaba shai bha la ka dei ki Sengbhalang jong ngi hangne ne ki Sengbhalang bar Jylla, ba ka jingkyrpad jong nga sha baroh ka long ba wat ym jam palat ia u pud. Phim lah ban jam palat ia u pud, ai ba ka ain kan ieng bad ka ain kan ym map iano iano ruh kiba donkti” ong u Bah Prestone haba iakren bad ki nongthoh khubor.
“Kumta, nga kwah ban kyrpad bad kyntu ia baroh (ki sengbhalang) ban kiar na kum kine ki jingjia, kaba pynsngewsih ia baroh. Kumta, nga kwah ban kyrpad ia baroh ba ka ain ka long halor ia baroh bad na ka liang ka Sorkar, ngin pynthikna ba ka ain kan iaid hala ka jong ka lynti” ula bynrap.
Kat kum ka jingong jong u, ka jingtohkit ia kane ka jingjia ka dang iaid shakhmat.
Haba kylli halor ka jinglong ka shongsuk shongsain hadien kane ka jingjia, u Bah Prestone ula ong “Peit shane, ka jingtynjuh kan don beit hynrei ngi la pynkhreh ia ka. Lada mih ki huri hura, ngi don ma ngi, ngi lah ban tehlakam bad kumta nga ong, ka jingkyrpad jong nga hi ka long tang katne, ba kino kino ki sengbhalang kim dei ban thep umphniang ia kane ka jingjia namar dang shen nga la iohi ia ki jingai khubor lamler, kaba lah ban aiding shuh shuh”.
“Kumjuh ruh, nga maham ia baroh ba kim dei ban iaid palat ia u pud bala buh da ka ain namar la pyniaid ia ngi da ka ain ki kanun” ula bynrap.
