Shillong Lber 26: U Nongialam ka Congress bad u MP ka Shillong u Bah Vincent H Pala hynne ka sngi Baar, ula ong ba ka BJP kan ym iop palat ia ka 200 Seat ha ka elekshon MP Lok Sabha kaban sa long shen.
Ula kynnoh ba lada ka BJP ka ioh 370 Seat, kin pynkylla iaka riti synshar jong ka ri da kaba weng noh ia ka kyntien ‘Secularism’ ban pynurlong iaka jingangnud jongki ban pynlong ia ka ri India kum ka ri Hindu.
Haba iakren bad ki nongpathai khubor hadien ba la dep thep kyrteng, u Bah Pala ula ong, “Haduh mynta, ka BJP kam pat pynbna ia ka thup kyrteng kaba saw, Balei? Namar ka don ka jingiashrut kaba shyrkhei hapoh. Kumta ka jingkylli ban jop palat ia ka 200 Seat kadei ka jingkylli kaba heh ia ki namar ba kim don satia ia ki kyrtong ha ki jylla kum ha Meghalaya bad ha ka Thaiñ Shatei Lammihngi. Kumno phin khmih lynti ia ki ban jop? Kadei tang ka buit ban pynbiej ia u paidbah”.
Ula ong ba ka BJP kala don 303 ngut ki MP ha kine ki snem kiba la dep hynrei mynta ka kynti kan hiar bha hapoh Maharashtra, Karnataka, Delhi, Bihar, Punjab, UP, Himachal Pradesh bad ha kiba bun ki jylla.
“Ha South, ka don palat 130 ngut ki MP bad mynta ka kynti ka Congress kan jop bun tylli ki Seat” ula ong.
Ula ong, ba ka jingpynbna ka BJP ban ioh haduh 400 seat kadei tang ka jingpynsawa ban pyni dak ia ki paidbah ka ri India.
“Ngi don 540 ngut ki MP. Ban pynkylla ia ka Constitution ne ka riti synshar ka ri India, ka BJP ka donkam 362 ngut ne haduh 370 ngut, bad dei na kane ka daw, ba ki pynbna ia ka 370. Kaba mut aiu 370, ka 370 kadei ka dak ka shin ka jingmaham ia ki paidbah ka ri India bad lada ki ioh 370 ngut kin pynkylla ia ka Constitution? Ka kyntien “secularism’ kan sa shah weng noh napoh jong ka Constitution” ong u Bah Pala.
“Lada weng ia ka kyntien ‘secularism’ na ka Constitution kumta kan long kum ka Pakistan. Ka Pakistan kadei ka Islamic State, ka Bangladesh kadei ka Islamic state, Iran kadei ka Islamic state, kumta ngin long kum ka Pakistan, bad kino kino kiba mane ia kiwei pat ki jait niam kin kylla long be-aiñ. Kane kadei ka jingthmu bad ka jingpyrta ia ka 370-400. Kin ym ioh ia katei, ki tip bha ba kin ym ioh hynrei ki shu kwah ban pyniapait iapra, kin leh beit ia katei, kin pynlong ia ka ri India kum ka ri Hindu, kane kadei ka jingangnud jong ka BJP” la ong u Bah Pala.
“Nga thikna ba bun na phi kidei ki Hindu, kiba bun na ki paralok ki jong ngi kidei ki Hindu hynrei ngi kwah ia ka ri kaba shongsuk, ngi kwah ia ka ri kaba lait na ka jingthombor, ngi kwah ia ka ri kaba lait na kino kino ki jingeh kumba mad ka Pakistan, Bangladesh bad kiwei kiwei” ula ong.
Ula kynnoh ba ka jingiashrut hapoh ka BJP kan jur bha mynta ka kynti.
U Bah Pala ula ong “Ki thrang bha mynta ka kynti. Phi iohi ba bun na ki MP kiba la rangbah ha ka kam, kila pynduh tiket bad bun ki MLA ruh kim shym la ioh ia ka lad. Lada phi peit ha Maharashtra, Madhya Pradesh bad Rajasthan, phin iohi ba ki nongialam kiba la rangbah kila shah bret sharud bad kila buh da ki nongialam kiba thymmai”
U MP ka Lok Sabha ula kynthoh pyrshah ruh ia u Myntri Rangbahduh ka ri u Narendra Modi.
U Bah Pala ula ong, “Sa kawei kaba long kongsan kaba long jar jar, phi tip lada ngi tei ia ka iingmane, u phadar ne nongsharai Balang kin pynkyntang ia ka, hynrei mynta u Myntri Rangbahduh ka ri India tang ban pynpait pynra ha kaba iadei bad ka Ram Mandir ha ka jaka jong ki Sadhu ba kin pyndep ne leh ia la ka kamram, kumta da u Politishan ula pyndep ia ka kam ka jongki”.
Ula pynpaw ia ka jingskhem jingmut ban jop biang ia ka elekshon MP bad ula pynpaw ia kiba bun ki jingtrei kiba ka seng Congress kala leh ha kine ki 15 snem kiba la dep bad ula ong pat, ba dang don bun kiei kiei kiba dang hap ban leh khamtam haba ka Meghalaya ka dang donkam ia ka Airport ka bathymmai.
“Ka Congress kala leh bha ha kaba iadei bad ka pule puthi, ka leit ka wan, ka khaii pateng, ka jingsam ryntih ia ka spah. Kumta ki polisi treikam kiba ka Congress kala leh ha ki snem kiba mynshwa ki iapher bak la bak na ki polisi treikam jong kane ka sorkar kaba mynta” ong u Bah Pala.
“Haba peit iaka polisi treikam jong kane ka sorkar kaba mynta, kiba riewspah kila nang riewspah shuh shuh katba kiba duk kin nang iai duk shuh shuh, hynrei ka Congress kan ialeh ban peit ia ka jinglong jingman bad ka jingiapher hapdeng uba riewspah bad uba duk bad kan ialeh ban pynduna ia kane ka jingiapher bad kumjuh ruh ia ka hok ban kren, ka niam ba ka Congress kala leh bun halor kine ki mat hynrei dang donkam ban dang leh bun shuh shuh” ong u Bah Pala.
Ula kubur ba ki don bun ki jingkynthoh pyrshah ia u namar ba ula jop 3 sien ia ka elekshon MP Lok Sabha, hynrei ki paidbah kin sa pyniapher ia kaei kaba ki MP ki ju leh bad kiei kiba ma u ula leh.
“Nga dei tang ma nga u MP uba la shah pynkynniuh ha ka BJP bad kiwei ki MP la kadei ha ka jylla Assam, Arunachal Pradesh, bun kila leit, balei kadei namar ba kila shah khwai ne shah byrngem. Kila phah ia ka ED bad ka IT pyrshah ia nga, hynrei ka jingshaniah bad ka jingieid ki paidbah ka Meghalaya. Nga tip ba nga don hangne namar ki paidbah bad da kaba buh ia katei ka jingmut jingpyrkhat, ki paidbah kin shaniah bad kin Vote ia nga” la pynkut u Bah Pala.
