Nongpoh, Lber 16: Ka All Khasi Hills Achik Federation (AKHAF) kala ai por 2 taiew ia ka Khasi Hills Autonomous District Council (KHADC) ba kan weng noh mardor ia ka hukum ba khang ia ki Garo ba kin bat ia ka kam Rangbah Shnong ha ki Shnong ba hap hapoh u pud u sam jong ka Council ne ha Ri-lum Khasi.
Kane ka jingdawa bad jingaipor ka dei ka rai kaba la shim da ka AKHAF ha ka jingialang paidbah jong ki paid Garo kaba long hynne ka sngi Saitjain, hapoh ka Shnong Nongspung A, kaba hap hapoh ka Pillangkata Outpost, Ri-Bhoi District.
Ha kane ka jingialang, la wan iashimbynta ruh da ki Nongialam ka AKHAF Womens’ Wing ka Ri-Bhoi District ba kynthup ia ka President Sermina D Marak, Vice President Sunita Ch Momin, ki Nongialam ka Sengkmie ba kyntnup ia u President CliftusCh marak bad u General Secretary Manueal Ch Marak bad kiwei kiwei.
Haba ai jingkren, u Manual Ch Marak bad ka Sermina D Marak, kila pynpaw ia ka jingsngewkhia halor ka jingkynnoh iuhroit ka KHADC ia ka hok synshar shnong da ki Garo ha ki shnong ba shong ba sah da ki paid Garo ha Ri-lum Khasi.
“Ka hukum ban nym ailad ia ki Garo ba kin bat kum ki Rangbah Shnong ha ki shnong Garo kadei ka jingiuhroit ia ngi ki paid Garo” kila ong.
“Ka hukum jong ka KHADC ka dei kaba ktah mationg bad pynming ia ka jingsngew jong ki paid Garo kiba shong ba sah ha ki shnong bapher bapher ha Ri-lum Khasi naduh ki spah snem mynshuwa bad kiba im hapdeng ka jingshongsuk shongshngain watla ka dei ha ki shnong ba iasah khleh Jaidbynriew” kila bynrap.
Kine ki Nongialam ka AKHAF kila ong “Kum ka Jaidbynriew Garo, ngim don kano kano ka jingsngew halor ki Shnong Khasi ba bat Rangbah Shnong da u Khasi hynrei ha ki shnong bas ah tang ki Garo, dei ban ailad ia ki Garo ban bat hi ia ka kam Rangbah Shnong”.
“Kumno yn wan synshar da kiwei pat ki jaidbynriew ha ki shnong Garo, ki bym tip ne nang ia ka rukom im, ka kolshor, ka lehniam leh rukom bad kiwei kiwei, kiba ki paid Garo ki tip bad ki pynneh” kila bynrap.
Kila pyntip ruh ba dang shen ka AKHAF kala dep iakynduh ia u Myntri Rangbah ka Jylla Conrad K Sangma ba un tuklar lem halor kane ka kam.
“Ngin aipor 2 taiew ia ka KHADC ba kan weng mardor ia ka hukum khang long Rangbah Shnong ia ki Garo ha ki shnong Garo lem kumta ka AKHAF kan shim da kiwei pat ki lad ki lynti kiba tyngeh ban iakhun iala ka jong ka hok ha ka synshar ka khadar” kila ong.
 kala ai por 2 taiew ia ka Khasi Hills Autonomous District Council (KHADC) ba kan weng noh mardor ia ka hukum ba khang ia ki Garo ba kin bat ia ka kam Rangbah Shnong ha ki Shnong ba hap hapoh u pud u sam jong ka Council ne ha Ri-lum Khasi.){kind=link}