Shillong, Lber 16: Ka tnad Jngohkai bad ka tnad ka rep ka riang jong ka jylla, kila pynkhreh ban pynlong ia ka “Strawberry Festival” naduh ka 5 tarik haduh ka 13 tarik u ïaiong 2024 ha kylleng jong ka jylla.
Kane ka long shibynta na ka jingshimkhia ka jylla ban kyntiew iaka rep ka riang bad ka kam jngohkai.
Lah ban kdew ba ka tnad Horticulture kala shim ia ka sienjam kaba khraw ha kaban pyniar iaka jingrep bad jingpynmih ia u sohshan ne Strawberry lyngba ki skhim na ka Sorkar Pdeng bad Sorkar Jylla.
Ka jingkheit ia u sohshan kala sdang mynta bad ki jaka rep ia une u soh ha ka shnong Syntung bad Nohron ha East Khasi Hills, Umktieh bad Sohliya ha Ri Bhoi, Baladinggre, Darechikgre, Durakantragre ha West Garo Hills ban pynlong ia ka Strawberry Festival.
Sa kawei pat kaban khring ia ki paidbah sha ka tamasa kan dei ruh kaba kin ioh ia ka lad ban kheit hi ia u sohshan na ka jaka rep, ban mad ia ka waiñ, jingshna ia ka Jam, ban iaid kai ha ki kper sohshan, ka jingtem jingput, ki prokram kiba iadei bad ka kolshor bad kan don ruh ka jingdie ia ki symbai sohshan.
