Shillong Lber 16: Ka Meghalaya BJP Kissan Morcha, kala ai jinghikai ia ki nongrep ha ka shnong Markasa bad sam ruh ia ki tiar bad ia ki symbai jhur sha ki nongrep ba kin ioh pyndonkam ha ka kamrep.
Katkum ka kyrwoh naka seng BJP Meghalaya kala pyntip ba ka Kissan Morcha hapoh ka jingialam u Bah Ralden Bryan Shabong bad u Bah Durut Majaw, kila pynlong iaka jingai jinghikai bad sam iaki symbai jhur bad ki tiar kynshait sha ki Nongrep bad ia kane ka jinghikai la pynlong khnang ban pyni, hikai, btin lynti bad pyntbit iaki iaka rukom rep jong ka juk ba mynta kaba lah ban iarap bad pynmih bun ki jingseisoh ba bun shah, ban pynduna ruh ia ka jingduhnong bad jinglehnohei bad ban pynioh nong kham bun ha ka liang ka rep ka riang jong kane ka shnong.
Ia kane ka jingai jinghikai la pynlong ha ryngkat ka jingiphuh iphieng da ka jingiatreilang bad ka Central Government Institute and Agriculture Scientists bad la shim ruh ia ki jingai jingmut na ki nongshong shnong kane ka thaiñ ia ka rukom synshar khadar kaba dei ruh ka mat treikam jong ka seng BJP kaba thmu ban lum ban wad bniah iaki lad ki lynti na baroh ki bynta jong ka ri India ban pynmih ki rukom treikam rukom pyniaid kam ban pynhun ia ka jingkwah bad jingkhmih lynti jong ki paid nongshong shnong.
Ka Meghalaya BJP Kissan Morcha kala pynlong ruh ia ka Health Camp ne jingai jingsumar ei na ka bynta ki khynnah ba hapoh 15 snem ha Umsaw bad la sam iaki khusnam sha ki Nongjop bad la sam ruh ia ki jaiñ ialehkai ne Jersey bad la don ruh ka jingiabam iadih sha sngewbha hadien ba lah wai ka jingia kynjat bol ia kaba la kyrshan da ka C.R.Projects bad Suraksha Medical Team.
U Hehduh jongka Meghalaya BJP Kissan Morcha u Bah Shabong ula ong, kane ka Jingai Jinghikai ka long kum shi bynta katkum ka mat treikam jong u Myntri Rangbah Duh ka ri, uba iai trei shitrhem na ka bynta ka jingiaid shaphrang ka kam jong ki nongrep ha kylleng ka ri India.
