Nongpoh, Lber 02: Ka Kynhun jong ka Synjuk ki Rangbah Shnong Ribhoi District hapoh ka jingialam jong u Bah BB Makdoh kum u Chairman mynta ka sngi Saitjain, kala pynpaw ia ka jingbitar halor ka jingbym shim khia ka sorkar jylla ban thung noh da u Block Development Ophisar uba pura jong ka Umsning C&RD Block ha kaba ka jingdon jong u BDO u bym pat tikna kala wanrah shibun ki jingdkoh ha ka jingpynïaid ïaki kam shnong kam thaw.
Haba kren sha ki lad pathai khubor u bah BB Makdoh ula pynpaw ia ka jingbitar halor ka jingleh bym suidniew da ka sorkar ban peit ïaki kam jong ki Shnong ba wat hadien ka jingleit ban kynduh ïa u Myntri ba dei peit ban pynpaw ïaki jingeh halor ka jingbym don ïa u BDO ba pura, hynrei kane ka jingleit kynduh jong ki, ka la shu long lehnoh ei bad kam shem la don kano kano ka jingshim khia na ka liang ka Sorkar.
U Bah Makdoh ula pynpaw ruh ba ka jingdon jong une u BDO ba mynta ha Umsning C&RD Block u dei u bym don bor eiei ban peit ha ki kam pisa pilaiñ bad kane ka la pynthud shibun ki kam Shnong ha kaba ïadei ban pyniaid beit ïaid ryntih ïaki skim bapher bapher naduh ka MGNREGA, ki Skim SRWP lem bad kiwei kiwei.
U Bah Makdoh ula ong, ba ka Synjuk ki Rangbah Shnong Ribhoi, ka dawa na ka sorkar Jylla ba kan thung noh ïa u BDO u ba pura ha Umsning Block bad ai por ruh hapoh shi taïew ba kadei ban pyndep ïa kane ka kam.
Ka Synjuk kala byrngem ruh ba lada ka sorkar ka sngap mynthi ïa kane ka jingdawa jong ki, kumta ka Synjuk ki Rangbah Shnong Ribhoi kan sa leit ban mih paidbah ha ophis jong u BDO Umsning ban ïakhih ïa kane ka mat bad ban dawa syndon haduh ban da ioh ïa u BDO uba pura.
