Assam, Lber 02: Ka Sorkar Assam hynne ka sngi Saitjaiñ kala pynlong ia ka jingialang ha Srimanta Sankaradeva Kalakshetra International Auditorium, Guwahati, ha kaba kala sam jingiarap da ka song tyngka ia ki dkhot barim jongka United Liberation Front of Assam (ULFA) bad ia ki bahaïing bahasem jong kine ki ehrang barim jong ka kynhun kieng atiar.
Ia kane ka prokram la pynlong da ka Tnad Kam Pohiing jong ka Assam ha kaba u Myntri Rangbah ka Assam u Himanta Biswa Sharma ula pyniaid ia katei ka jingialang kum u Kongsan ha ka jingdonlang u Avinash P. Joshi uba long u Additional Chief Secretary ka sorkar Assam, ki heh ophisar bad kiwei kiwei.
U Himanta Biswa Sharma, kum ka dak jong ka jingbha, ula sam ia ka Fixed Deposit Certificate kaba kot T.4 Lak marwei sha ki 852 ngut ki dkhot barim jong ULFA lyngba ka Surrender Cum Rehabilitation Scheme jong ka Sorkar India.
Nalor kane, ula sam ia ka T.3 Lak marwei sha ki 45 ngut kiba la mynsaw ha ka jingiasiat ryngkat lang bad ka Special Package kaba T.3 Lak na ka sorkar Assam.
La sam ruh ia ka T.5 Lak marwei sha ki 8 ngut ki riewshimet kiba la shah thombor bad T.10 Lak marwei sha ki bahaiing bahasem jong ki 31 ngut ki dkhot ka ULFA kiba lajah klep bad haba kheiñ kyllum lang baroh, ki don 936 ngut kiba la ioh jingmyntoi lyngba katei ka Rehabilitation Grant.
Kane ka jingialang kadei ka dak jongka jingpyni jong ka Sorkar Assam ia ka jingshimkhia ban wanrah ia ka shongsuk shongshngaiñ hadien ba ka ULFA kala iasoi ia ka Memorandum of Settlement (MoS) bad ka Sorkar India bad Sorkar Assam ha ka 29 tarik u Nohprah 2023.
